24 თებერვალს რუსეთმა უკრაინაში საჰაერო და სახმელეთო შეჭრა განახორციელა და თანამედროვე სამყარომ ახალ რეალობაში გაიღვიძა. მაშინ, როდესაც უკრაინაში ომია, ჩვენ − ყველანი, როგორც შეგვიძლია ისე გამოვხატავთ საკუთარ სოლიდარობას უკრაინის მიმართ. ქართველმა დიზაინერებმა სხვადასხვა ფორმით გამოხატეს თავიანთი მხარდაჭერა უკრაინელი ხალხისადმი.
გიორგი ქებურია უცხადებს მხარდაჭერას უკრაინას და რუსეთიდან შეკვეთების მიღებას აჩერებს. ასევე, ბრენდმა შექმნა ქუდი უკრაინის დროშის ფერებში, რომელიც ორი კვირის განმავლობაში დიზაინერის ვებსაიტზე იყიდებოდა. გაყიდვებიდან მიღებული შემოსავალი სრულად მოხმარდება უკრაინელი ხალხის ჰუმანიტარულ დახმარებას.
მაკა კვიციანი, Dalood
ქართულ ბრენდ Dalood-ის კრეატიულმა დირექტორმა მაკა კვიციანმა გამოთქვა მზადყოფნა უკრაინელი ლტოლვილების დასაქმებისთვის.
„ჩვენ სოლიდარობას ვუცხადებთ უკრაინელ ხალხს, ჩვენი მხრიდან კი რაც შეგვეძლო გაგვეკეთებინა, იყო ის, რომ უკრაინელი ლტოლვილებისთვის შეგვეთავაზებინა სამუშაო ადგილი. უკვე გვქონდა ორი გასაუბრება, ადგილი ჯერ კიდევ ვაკანტურია. მკერავი იქნება თუ კონსტრუქტორი, ჩვენ მზად ვართ უკრაინელები დავასაქმოთ აღნიშნულ პოზიციებზე“, − განაცხადა მაკა კვიციანმა.
დიზაინერმა ალექსანდრე ახალკაციშვილმა #OK!-ისთან საუბრისას თავისი პოზიცია დააფიქსირა.
„ნებისმიერი მოქალაქის პასუხისმგებლობაა დღეს მეგობარი ერისა და სახელმწიფოს მხარდაჭერა, უსამართლობის შემჩნევა და ამაზე რეაგირება. პროტესტის სხვადასხვა ფორმა არსებობს და ჩვენ ვაკეთებთ მაქსიმალურს, რაც ჩვენს რესურსებშია და საქმის ჩარჩოებშიც ჯდება“.
როგორც ალექსანდრე ამბობს, მან შეაჩერა გაყიდვები რუსეთსა და ბელარუსში და აქტიურად იღებს მონაწილეობას სხვადასხვა საქველმოქმედო აქტივობაში.
„პირველი შეზღუდვა შეეხო ექსპორტს. ჩვენი ვებსაიტიდან რუსეთსა და ბელარუსში გაყიდვები შეჩერდა. არ ვთანამშრომლობთ და არ ვითანამშრომლებთ რუსულ მაღაზიებთან და ეს ასე იქნება, ვიდრე ომის პროვოცირებას რუსეთი არცერთ ქვეყანაში აღარ შეეცდება, თუნდაც ეს დრო იყოს რამდენიმე დეკადა. ჩვენ გვაქვს გამოყოფილი კატეგორია „დავეხმაროთ უკრაინას“ და გაყიდული ნივთების ღირებულების 100% მიდის ქველმოქმედებაში, უკრაინელების დასახმარებლად“.
დიზაინერმა გაიხსენა ემოციური შეხვედრა ერთ-ერთ უკრაინელ მოდელთან ბოლო კამპანიიდან.
„პარიზში გვქონდა უახლესი კოლექციის კამპანიის გადაღება, სადაც უკრაინელი მოდელი გვყავდა, კერძოდ − მარიუპოლიდან. გადაღებამდე 5 დღე მას მშობლებთან კონტაქტი არ ჰქონდა და ვერ უკავშირდებოდა. მომავალში, როცა ფოტოები გამოქვეყნდება, მიხვდებით მისი გამომეტყველებით, თუ როგორაა ოკუპაცია ადამიანის თვალებში ასახული. ეს ძალიან დამთრგუნველი და ემოციური იყო“.
რუსეთთან ბიზნესპარტნიორობას წყვეტს ასევე ქართული ბრენდი MATERIEL. გარდა ამისა, ბრენდი თანამშრომლობს უკრაინის საელჩოსთან, წითელ ჯვართან და აქტიურად გაუწევს ჰუმანიტარულ დახმარებას უკრაინას.
„სანამ უკრაინის ხალხი გაუთავებლად იტანჯება, დუმილის ადგილი არ იქნება. დუმილი უმოქმედობის ტოლფასია, სწორედ ამ დროს უნდა გაერთიანდეს მოდის ინდუსტრია და მხარი დაუჭიროს უკრაინის სუვერენულ ერს მთელ მსოფლიოში“.
„დავეხმაროთ ცხოველებს უკრაინის ომის დროს“, − ეს საინტერესო ინიციატივა Grigor Devejiev-ს ეკუთვნის. დიზაინერმა დროებით ინსტაგრამის საკუთარი ანგარიში საქველმოქმედო ონლაინმაღაზიად გადააკეთა. შემოწირულებითა და გაყიდვებით შემოსული თანხა მთლიანად გადაირიცხება უკრაინის უსახლკარო ცხოველების თავშესაფრის დასახმარებლად.
დემნა გვასალია, BALENCIAGA
6 მარტს პარიზის მოდის კვირეულის ფარგლებში, „ბალენსიაგას“ ჩვენება ჩატარდა. Balenciaga-ს ქართველმა კრეატიულმა დირექტორმა, დემნა გვასალიამ ღიად გამოხატა საკუთარი მხარდაჭერა უკრაინის მიმართ. შოუ ძალიან ემოციური იყო. ჩვენებაზე მისულ სტუმრებს სკამებზე მაისურები დახვდათ უკრაინის დროშის ფერებში და წერილი დემნასგან, რომელშიც ეწერა:
„უკრაინაში მიმდინარე ომმა წარსული ტრავმის ტკივილი გამიმწვავა, რომელსაც 1993 წლიდან ვატარებ − იმ დროიდან, როცა ჩემს მშობლიურ ქვეყანაში იგივე მოხდა და სამუდამოდ ლტოლვილი გავხდი. სამუდამოდ, რადგან ეს არის ის, რაც შენში რჩება: შიში, სასოწარკვეთა, იმის გაცნობიერება, რომ არავის უნდიხარ. მაგრამ ასევე მივხვდი, რომ ცხოვრებაში, რასაც ნამდვილად აქვს აზრი და რაც ყველაზე მნიშვნელოვანია, არის თავად სიცოცხლე, ადამიანური სიყვარული და თანაგრძნობა…“
როგორც ქართველმა დიზაინერმა აღნიშნა, ის შოუს გაუქმებაზეც კი ფიქრობდა, თუმცა საბოლოოდ მაინც გადაწყვიტა ამ ფორმით ჩაეტარებინა ჩვენება.
„თუმცა შემდეგ გავაანალიზე, რომ ამ შოუს გაუქმება დანებების ნიშანი იქნებოდა იმ ბოროტების წინაშე, რომელიც თითქმის 30 წელია ასეთ ტკივილს მაყენებს. გადავწყვიტე, რომ ეგოს ამ უაზრო, უგულო ომისთვის, ჩემს ნაწილებს აღარ გავწირავ“.
ჩვენება გაიხსნა უკრაინულ ენაზე. თოვლსა და ქარში მოსიარულე მოდელები, ემოციური მუსიკა და მისტიკური გარემო უფრო მეტად დრამატულს ხდიდა ამ ყველაფერს.
კოლექციიდან ბოლო ორი Look-ი სიმბოლურად უკრაინის ფერებში იყო.
ჩვენება დასრულდა ისევ დემნას სიტყვებით: Живи, Украино!
