“პანგოლინი ქიდსი” ერთი წლის წინ დაარსდა და სულ რაღაც 4 თვეა აქტიურად გამოჩნდა ქართულ ბაზარზე. ბრენდი შექმნილია ორი მეგობრის – სალომე ნიკვაშვილისა და ანუკი ქორქიას მიერ, რომლებსაც პირადად ვესაუბრეთ და დეტალურად გავიცანით მათი საქმიანობა და მოღვაწეობა.
გაგვაცანით ბრენდი “პანგოლინი ქიდსი”. რამდენი ხანია რაც ბაზარზე გამოჩნდა?
გამომდინარე იქედან, რომ ვართ ბავშვობის მეგობრები კარგად ვიცნობთ ერთმანეთის გემოვნებას, ხასიათს, ზნეს, პასუხისმგებლობის უნარსა და შრომისმოყვარეობას, გადავწყვიტეთ ერთად შეგვექმნა რაღაც განსაკუთრებული, ყველაზე ჯადოსნური არსებებისათვის -ბავშვებისთვის. ჩვენ უზარმაზარი დროისა და ენერგიის რესურსი ჩავდეთ ამ საქმეში. მნიშვნელოვანი ნაწილი გახლავთ ის, რომ გვქონდა სრული თანხვედრა იდეების, მიზნებისა და მათი განხორციელების ნაწილში. “პანგოლინი ქიდსი” საბავშვო სამოსის პრემიუმ ხაზია, რომელიც იქმნება მაღალი ხარისხის ბუნებრივი ქსოვილებისაგან. ერთ-ერთი მნიშვნელოვანი იდეა, რომელიც განვახორციელეთ არის შემეცნებითი ხასიათის ინფო ბარათები, რომელიც თან ახლავს თითოეულ მოდელს.
რა სახის პროდუქციას სთავაზობთ მომხმარებლებს?
ჩვენ მომხმარებელს ვთავაზობთ ნატურალური ქსოვილებისა და რთული კონსტრუქციებისაგან შემნილ სამოსს, გოგონებისა და ბიჭებისათვის. თითოეული მოდელი იკერება ლიმიტირებული რაოდენობით.
რა ასაკზეა გათვლილი “პანგოლინი ქიდსის” სამოსი გათვლილი?
“პანგოლინი ქიდსის” სამოსი იქმნება 2-8 წლის ასაკის ბავშვებისათვის.
გვესაუბრეთ ხარისხზე და ნიშაზე.
ჩვენ გადავწყვიტეთ აგვეთვისებინა ადგილობრივ ბაზარზე დეფიციტური ნიშა. კერძოდ დავიწყეთ პრემიუმ ხარისხის საბავშვო სამოსის წარმოება. თითოეული მოდელი არის ავთენტური და როგორც ზემოთ ავღნიშნეთ იკერება ლიმიტირებული რაოდენობით. ყოველი მათგანისათვის იქმნება ნახატი, რომელიც შემდგომ ნაქარგის სახით დატანილია კონკრეტულ მოდელზე. სწორედ ამ ნაქარგების ინსპირაციით იქმნება შემეცნებითი ხასიათის ინფო ბარათები, სადაც ბავშვისათვის საინტერესო და გასაგებ ენაზე მოთხრობილია მისსავე სამოსზე არსებული ნაქარგის (ცხოველი, ფრინველი, მცენარე და ა.შ.) შესახებ.
რატომ “პანგოლინი”?
წარმოუდგენელია პანგოლინი ერთხელ ნახო და შეძლო მისი დავიწყება, იმდენად განსხვავებული ვიზუალის მქონე ძუძუმწოვარია. სწორედ ამიტომ ახლოსაა ჩვენს იდეასთან. ჩვენი მიზანიც სწორედ ეს იყო, წარუშლელი შთაბეჭდილება დაგვეტოვებინა ჩვენი მომხმარებლისათვის.
სად შეგვიძლია თქვენი პროდუქციის შეძენა?
ამ ეტაპზე ჩვენი პროდუქციის შეძენა შესაძლებელია ონლაინ პლატფორმაზე.
როგორია ბრენდის სამომავლო გეგმები?
ჩვენი მთავარი მიზანია ადგილობრივ ბაზარზე ჩავანაცვლოთ პრემიუმ ხარისხის იმპორტული ბრენდები. შემდეგი ნაბიჯი ექსპორტზე გასვლა და საერთაშორისო ბრენდებისათვის ღირსეული კონკურენციის გაწევაა. ამ ეტაპზე ვთანამშრომლობთ რამდენიმე მულტიბრენდულ მაღაზიასთან.
