მაშინ, როდესაც უკრაინაში ომია, ჩვენ, ყველა, როგორც შეგვიძლია ისე გამოვხატავთ საკუთარ მხარდაჭერას უკრაინელი ხალხის მიმართ. ერთ-ერთი პირველი ქართული კომპანია, რომელიც თავიდანვე ჩაერთო ჰუმანიტარულ აქტივობაში იყო PSP. ამ დროისთვის კამპანია „PSP უკრაინისთვის“ ფარგლებში, კომპანიის მიერ 550 000 ლარის ჰუმანიტარული ტვირთია გაგზავნილი.
ომის დაწყებიდან მალევე PSP-მ პირველ ჰუმანიტარულ გზავნილთან ერთად, საქართველოდან 200 000 ლარის სამედიცინო დანიშნულების საშუალებები, სახარჯი მასალები და მედიკამენტები უკრაინაში გაგზავნა. ასევე, PSP-მ იზრუნა მომხმარებლის ჩართულობასა და თანამონაწილეობაზე.
აფთიაქებში საქართველოს დროშასთან ერთად უკრაინის დროშები და ჰუმანიტარული დახმარების შესაგროვებელი ყუთები განათავსა. ყუთები სიმბოლურად უკრაინის დროშის ფერებშია და მასში ნებისმიერ მსურველს შეეძლო სიმბოლური თანხა გაეღო და თავისი წვლილი შეეტანა უკრაინელი ხალხის მხარდაჭერად. ასევე, თანხის შეგროვების მიზნით, PSP-ს თანამშრომლები აქტიურად ჩაერთნენ #GE4UA კამპანიაში. შეგროვილი თანხით კი PSP საინიციატივო ჯგუფს მედიკამენტებს სპეციალური პირობებით აწვდის.
როგორც PSP-ში ამბობენ, ადამიანებზე ზრუნვა ყოველთვის მათ პრიორიტეტს წარმოადგენდა, თუმცა დღეს, ისე როგორც არასდროს, საჭიროა უკრაინელი ხალხის დახმარება. კომპანიას აქტიურად აქვს კომუნიკაცია უკრაინის საელჩოსთან და ის მუდმივად საქმის კურსშია, თუ რა არის პრიორიტეტული, რა უფრო სჭირდება უკრაინელ ხალხს, რადგან ეს საჭიროებები მუდმივად იცვლება. შესაბამისად, მეორე ეტაპზე PSP-მ გაგზავნა 20 000 ლარის ღირებულების ბავშვის საკვები, ფაფა, რძე და ჩაი, საფენები ბავშვებისთვის.
ამ საპასუხისმგებლო და კეთილ საქმეს PSP თავის ერთგულ პარტნიორებთან ერთადაც აგრძელებს:
კორეული კომპანია „მიზონის“ მიერ ჰუმანიტარული დახმარებისთვის გამოყოფილი $50 000 PSP-მ გააორმაგა და მომდევნო ეტაპზე $95 000-ის მედიკამენტები და ბავშვთა კვება გაგზავნა.
ამ ყველაფერთან ერთად, PSP შეეცადა ემოციური მხარდაჭერაც გამოეხატა საქართველოში მყოფი უკრაინელი მოქალაქეებისთვის. 8 მარტს ქალთა საერთაშორისო დღის აღსანიშნავად, საქართველოში მყოფ 200 უკრაინელ ქალბატონს საჩუქრად თავის მოვლის ევროპული ბრენდების პროდუქციის ნაკრები გადასცა.
PSP ძუძუს კიბოსთან ბრძოლის საერთაშორისო ორგანიზაციის საქართველოს ოფისს − „ევროპა დონა ჯორჯიას“ უკრაინელი ბენეფიციარებისთვის ონკოპრეპარატები გადასცა.
„უკრაინაში ორმაგად მძიმეა მდგომარეობა იმ ონკოპაციენტებისათვის, ვისი სიცოცხლეც უწყვეტ მკურნალობაზეა დამოკიდებული, სწორედ ამიტომ ჩვენმა ორგანიზაციამ შეიმუშავა ინიციატივა, რომ დავხმარებოდით უკრაინელ ონკოპაციენტებს. უდიდესი მადლიერების გრძნობით მინდა აღვნიშნო „პსპ ფარმას“ მხარდაჭერა, რომელიც შემოუერთდა ჩვენს ინიციატივას და ჩვენს ორგანიზაციას გადასცა სოლიდური რაოდენობა იმ პრეპარატებისა, რომელიც სასიცოცხლო მნიშვნელობისაა უკრაინელი ონკოპაციენტებისთვის“, – განაცხადა „ევროპა დონა ჯორჯიას“ პრეზიდენტმა ანა მაზანიშვილმა.
აღსანიშნავია, რომ ყველა ორგანიზაციას, რომელსაც უკრაინისთვის ჰუმანიტარული დახმარების გაგზავნის მიზნით მედიკამენტებისა და ბავშვთა კვების, საფენების შეძენა სურდა, კომპანია PSP სპეციალურ ფასებში აწვდიდა პროდუქციას.
