ბოლო ერთი თვის განმავლობაში საქართველოში მიმდინარე საპროტესტო აქციებიდან უცხოელი თუ ქართველი ფოტოგრაფების დასამახსოვრებელი ფოტოები ვრცელდება. განსაკუთრებით, დიდი მოწონება ეგვიპტელმა ფოტოგრაფმა ეზ გაბერმა დაიმსახურა, რომელსაც 2024 წლის აქციების ფოტომემატიანეც კი შეგვიძლია ვუწოდოთ. ეზ გაბერი ქართველმა ხალხმა როგორც რუსული კანონის წინააღმდეგ აქციების ფოტოების ავტორად გაიცნო, თუმცა ეგვიპტელი ფოტოგრაფი საქართველოში უკვე 6 წელზე მეტია იმყოფება.
32 წლის გაბერი ფოტოგრაფიით ეგვიპტეშივე იყო დაინტერესებული, თუმცა საქართველოს ულამაზესი ბუნების ნახვის შემდეგ ამ მიმართულებით კიდევ უფრო დაინტერესდა. აქციებამდე ახალგაზრდა ფოტოგრაფი სწორედ საქართველოს სხვადასხვა კუთხიდან გადაღებულ ფოტოებს ავრცელებდა და უცხოელ ტურისტებში ჩვენი ქვეყნის პოპულარიზაციას ეწეოდა. იგი ფოტოგრაფიის გარდა, ტურიზმითა და მარკეტინგითაც არის დაინტერესებული.
გთავაზობთ OK!- ის ექსლუზიურ ინტერვიუს ეგვიპტელ ფოტოგრაფთან ეზ გაბერთან
პირველ რიგში, მოგვიყევით თქვენს შესახებ, საიდან ხართ?
მე ვარ ეზ გაბერი ეგვიპტიდან, 32 წლის. საქართველოში 2017 წელს ჩამოვედი და 6 წელზე მეტია თბილისში ვცხოვრობ. ფოტოგრაფი და ვიდეოგრაფი ვარ, ასევე ვმუშაობ მარკეტინგისა და ტურიზმის სექტორში.
როდის დაინტერესდით ფოტოგრაფიით?
ფოტოგრაფიით ეგვიპტეშივე ვიყავი დაინტერესებული, თუმცა რაც საქართველოში ჩამოვედი, უფრო მეტად გამიჩნდა ინტერესი ამ მიმართულებით, რადგან აღფრთოვანებული ვიყავი საქართველოს ბუნებით. როდესაც საქართველოს სხვადასხვა კუთხეში მივდივარ, ჩემი მიზანია, ბუნების დამალული სილამაზე ხალხს გავუზიარო და სხვა თვალით დავანახო.
რატომ საქართველო ?
ერთხელ ეგვიპტეში ქართველ ადამიანს შევხვდი. მან საქართველოს შესახებ მომიყვა და დამპატიჟა. გადავწყვიტე ჩამოვსულიყავი და საკუთარი თვალით მენახა . ყველგან სიმწვანე იყო, წყალი და მდიდარი ბუნება, ასევე უთბილესი ხალხი. საქართველოს აქვს უძველესი კულტურა და შესანიშნავი ტრადიციები, ამიტომაც გადავწყვიტე მთელი ცხოვრების აქ გატარება.
აქციების გარდა, საქართველოში კიდევ რას იღებთ?
გარდა აქციებისა, დაინტერესებული ვარ საქართველოს ბუნებისა და ღირსშესანიშნაობის გადაღებით სხვადასხვა კუთხიდან.
გაგიჭირდათ თუ არა ფოტოების გადაღება აქციიდან?
ფოტოგრაფიას ნიჭი და კრეატიული ხედვა სჭირდება. კარგი კადრის გადასაღებად სისხარტეა საჭირო. აქციებიდან ფოტოების გადაღება ცოტა რთული იყო, შესაძლოა იმიტომ, რომ უცხოელი ვიყავი. თუმცა, ძალიან ბედნიერი ვარ, რომ ქართველები ჩემს გადაღებულ ფოტოებსა და ვიდეობზე საუბრობენ.
თქვენ როგორც მოქალაქე, რას ფიქრობთ საქართველოში ბოლო დროს მიმდინარე პროცესებზე?
ძალიან რთულია ახლა საქართველოში ვითარება. მინდა, საქართველო ერთიანი და უსაფრთხო ქვეყანა იყო. დარწმუნებული ვარ, ასეც იქნება.
როგორ მოგწონთ ჩვენი კულტურა და ტრადიციები და განსაკუთრებით რომელს გამოარჩევდით?
საქართველო მდიდარი ქვეყანაა განსხვავებული კულტურის ერთიანობით. მომწონს საჭმელი და უძველესი ქართული ცეკვა. განსაკუთრებით კი, კახეთის კულტურას გამოვარჩევდი.
ქართული სამზარეულოდან რომელ კერძებს გამოარჩევდით?
შესაძლოა გაგიკვირდეთ, მაგრამ ოსტრი და ჩაქაფული საუკეთესოა.
ვიცით, რომ ბევრგან მოგზაურობთ, რით განსხვავდება საქართველო სხვა ქვეყნებისგან?
ულამაზესი ბუნებით, უთბილესი ხალხითა და განსხვავებული კულტურით
გთავაზობთ ეგვიპტელი ფოტოგრაფის – ეზ გაბერის ფოტოებს
![](https://okmagazine.ge/wp-content/uploads/2024/05/436241439_10160219790589542_7488170343688806043_n-1.jpg)