გამომდინარე იქიდან, რომ თვითიზოლაციისა თუ კარანტინის დღეებმა თითოეული ადამიანის ცხოვრება რადიკალურად შეცვალა, საზოგადოებას მოუწია ადაპიტრება იმ წყობასთან, რომლის გარეშეც ეპიდემიასთან გამკლავება შეუძლებელია. შესაბამისად, საინტერესოა, როგორ ატარებენ დროს ის ადამიანები, რომელთა ცხოვრების წესიც მუდმივ სოციალურ აქტივობასა და საზოგადოების ყურადღების ცენტრში ყოფნას მოითხოვდა, მათ შორის ერთ-ერთი ანუკი არეშიძეა, რომლის ყოველდღიურობითაც ამჯერად მორიგი ცნობილი იტალიური გამოცემა Luisaviaroma დაინტერესდა და მოდური სიახლეებით დაინტერესებულ მკითხველს საინტერესო ინტერვიუ შესთავაზა.
–ახლა სად იმყოფებით?
-სახლში, თბილისში.-სად გენდომებოდათ ახლა ყოფნა?
-ირლანდიაში (Slea Head).
-რას გეგმავთ როგორც კი ეს ყველაფერი მორჩება?
უბრალოდ ყველგან წავალ – მეტროში, ქუჩებში.. სადაც რაც შეიძლება მეტი ხალხი იქნება, რადგან მინდა ყველას ვესაუბრო იქნებიან ისინი მეგობრები, თუ უცნობები! ყველა ღონისძიებას დავესწრები, სადაც დამპატიჟებენ, ყველა!
-როგორ ატარებთ კარანტინის დღეებს?
-დილა ჩემი ოთხი შვილით და მათი ონლაინ გაკვეთილებით იწყება, ამასობაში მე საქმის საქმეებით ვარ დაკავებული, რაც დალაგებასა და საჭმლის მომზადებასაც მოიცავს, პარალელურად, ვამოწმებ საქმიან შეტყობინებებს.
შემდეგ, ვცდილობ იოგას ონლაინ გაკვეთილებს მივმართო.. მაგრამ ეს სახლში თითქმის შეუძლებელია, რადგან მარტო, სიწყნარეში არასდროს ხარ და ყურადღების კონცენტრირება გიჭირს. შუადღეს, ბავშვები, როგორც წესი, ეზოში თამაშობენ საკუთარ ძაღლებთან ერთად, ამასობაში, მე კვლავ სამზარეულოში ვსაქმიანობ. გვიან საღამოს კი, ყველანი ერთად ფილმებს ვუყურებთ, ეს ფაქტობრივად ერთადერთი საქმიანობაა, როცა ოჯახში სიწყნარე ისადგურებს.
10 საათის შემდეგ ბავშვები იძინებენ და ფაქტობრივად ეს არის დრო, როცა ჩემი ცხოვრება იწყება – ბევრს ვკითხულობ, საყვარელ სერიალებს ვუყურებ, ფონად კი, ჯაზის რომელიმე კომპოზიციას ვუსმენ.
