პროფესიონალი ვიდეოგრაფი არის ადამიანი, რომელიც თქვენი მნიშვნელოვანი დღის აღსაბეჭდად გჭირდებათ. მან ფირზე უნდა შემოგინახოთ ის ბედნიერი წუთები, პატარა დეტალები და დადებითი ემოციები, რომელიც ამ მნიშვნელოვან დღეს მუდამ გაგახსენებთ. ჟურნალი OK! გაგაცნობთ ვიდეოგრაფ როსტომ კამლაძეს, რომელიც ინდივიდუალური ხედვითა და პროფესინალიზმით გამოირჩევა.
პირველად როდის დაინტერესდით ვიდეოგრაფობით?
ყოველთვის მიყვარდა ვიდეოების გადაღება, შემდეგ მათი ნახვა და იმ განსაკუთრებული დეტალების აღმოჩენა, რომელსაც გადაღებისას ვამჩნევდი. ეს პროცესი ჩემთვის სასიამოვნო იყო, სწორედ ამიტომ წლების შემდეგ ვიდეოების გადაღება ყოველდღიურ საქმიანობად ვაქციე და ასე ავირჩიე ეს პროფესია.
შეიძლება ითქვას, რომ ვიდეოგრაფობა საკმაოდ დიდ დროს, ენერგიასა და შრომას მოითხოვს, შესაბამისად, ამ პროფესიას ჩემს ცხოვრებაში დიდი და განსაკუთრებული ადგილი უჭირავს.
ვიდეოგრაფიის რომელი მიმართულება აირჩიეთ?
ასე ერთი მიმართულება არ მაქვს არჩეული. ყველა მიმართულებაში მიცდია ჩემი თავი, რადგან ძალიან მიყვარს ექსპერიმენტები, თუმცა ამ ეტაპზე უმეტესად საქორწილო მიმართულებით ვმუშაობ. ქორწილი ერთ-ერთი მნიშვნელოვანი ღონისძებაა, რომელიც დიდ პასუხისმგებლობას მოითხოვს, რადგან წყვილი განდობს მათთვის ყველაზე მნიშვნელოვანი დღის აღბეჭვდას ფირზე. ეს კი დიდ პროფესიანალიზმს მოითხოვს. რა თქმა უნდა, ძალიან სასიამოვნოა, როდესაც კარგ შედეგს იღებ და ამით ადამიანებსაც აბედნიერებ.
რა სახის ვიდეოგრაფიულ მომსახურებას სთავაზობთ საზოგადოებას?
ჩემი მომსახურება მოიცავს: სარეკლამო, საქორწილო და სხვა ტიპის ღონისძიების გადაღებას. ასევე, მითანამშრომლია სამოდელო სააგენტოებთან. როგორც უკვე აღვნიშნე ექსპერიმენტებს არ ვუშინდები, ასე რომ სიახლეები არ მაშინებს.
როგორ ფიქრობთ, რა არის თქვენი ხელწერა?
ჩემი ინდივიდუალური ხედვა და გემოვნება, რასაც ვერ დააკოპირებ. ვცდილობ თითოეული ჩემი გადაღებული ვიდეოთი მოვყვე ერთ ამბავს. ჩემი მიზანია, სრულად გადმოვცე ის ბედნიერი წუთები, სადღესასწაულო განწყობა და დასამახსოვრებელი კადრები შევქმნა.
გარდა ამისა, გამოვირჩევი საქმისადმი სერიოზული დამოკიდებულებითა და დიდი ენთუზიაზმით.
როგორ იბადება იდეა?
იდეები და ინსპირაცია ძირითადად გარემოზე დაკვირვებით მომდის, ასევე თვალს ვადევნებ ტენდენციებს და ჩემეული ხედვით გადმომაქვს ჩემს ნამუშევრებში.
სამომავლო გეგმები
უპირველესად, ვაპირებ სიღრმისეულად ვისწავლო და განვვითარდე უფრო მეტად ჩემს პროფესიაში. მინდა ხელოვნების დონეზე ავიყვანო ჩემი პროფესია და შემდგომ ვცადო მოკლემეტრაჟიანი ფილმის გადაღება.
ტექსტი: სოფიო მალანია
