უახლეს რეალობაში სარესტორნო ბიზნესში ახალი ტრენდი ვითარდება ‘’რესტორანი სახლიდან’’. საქართველო კი, როგორც გასტრონომიული კულტურის ქვეყანა, ამ სიახლეებს ფეხდაფეხ მიყვება.
სტარტაპი Sliceit სწორედ ასეთი პლატფორმაა, რომლის შესახებაც უფრო დეტალურად დამფუძნებელი ნინი ქვირია მოგვიყვება.
ნინი, რა იყო სტარტაპის შექმნის ინსპირაცია?
პირადად ჩემთვის ყოველთვის მიმზიდველი იყო კვებასთან დაკავშირებული – საკითხები. სამსახურის შემდეგ შეუცვლელი განტვირთვა იყო და არის, კაფე-რეტორნებში სტუმრობა, ნაცნობი თუ უცნობი კერძების დაგემოვნება და შეფასება. როდესაც მივხვდი, რომ ეს ერთგვარი ჰობი გახდა ჩემთვის, დავიწყე წერა და შევქმენი საკუთარი ფუდ ბლოგი, სადაც გარემოსა და მოწონებულ კერძებს განსაკუთრებულად აღვნიშნავდი. მეგობრები, ახლობლები თუ უცნობებიც ხშირად მეკითხებოდნენ აზრს კონკრეტული კერძი უფრო გემრიელად სად შეეძლოთ რომ გასეინჯათ. ასე ვთქვათ, მათი გზამკვლევი გავხდი კონკრეტულად ამ სფეროში.
რა არის Sliceit და როგორ შეიძლება მისი გამოყენება?
პანდემიის დაწყების შემდეგ, მოგეხსენებათ შეიზღუდა და საერთოდაც აიკრძალა კაფე-რესტორნებში სტუმრობა და ეს არა მხოლოდ ჩემთვის , ყველასთვის დიდ დისკომფორტს წარმოადგენდა.
დავაკვირდი რომ სოციალურ ქსელებში განსაკუთრებით გააქტიურდნენ ადამიანები, რომლებმაც კერძების სახლში მომზადება დაიწყეს, თავიანთ შედევრს კი საზოგადოებას უზიარებდნენ და შეფასებას ელოდნენ. მე პირადად არ მიყვარს მომზადება და არც გამომდის, მაგრამ სხვის მიერ შექმნილ, გემრიელი კერძის დაგემოვნებაზე უარს არ ვამბობ. ბევრჯერ იყო ისეთი შემთხვევა, რომ მიფიქრია ახლა ამას სიამოვნებით გავსინჯავდითქო. ამიტომაც გადავწყვიტეთ შეგვექმნა ბიუროკრატიებისგან თავისუფალი პლატფორმა, რისი საშუალებითაც გემრიელი საჭმელები სახლიდან-სახლში გადავა და მოყვარული თუ პროფესიონალი მზარეულები თავიანი შექმნილი კერძების რეალური სახით გაზიარებას შეძლებენ.
პლატფორმა Sliceit სულ მალე ჩაეშვება, დაინტერესებულ ადამიანებს კი მისი გამოყენება როგორც სმარტფონის, ასევე ვების საშუალებით შეეძლებათ.
