მომავალზე ფიქრი არის ფიქრი ახალგაზრდობაზე… ადამიანებზე, რომლებიც ჩვენ წინ არიან და შესაძლოა სულაც არ ვიცნობთ კარგად… ამიტომ უნდა დავინახოთ, გავიცნოთ და მოტივაცია მივცეთ აკეთონ ის, რაც მათი ცხოვრების არსია, შემდეგ კი, ეს თაობა აუცილებლად შექმნის ქვეყნის უკეთეს მომავალს. მსახიობი მარიამ ქანთარია თაობის ფასეულობებსა და გეგმებზე გვიამბობს.
რას საქმიანობთ, და გაგვაცანით ამ ეტაპზე თქვენს ცხოვრებაში ის ძირითადი და მნიშვნელოვანი გამოწვევები, რომელთან გამკლავებაც გიწევთ?
ამ ეტაპზე ისაა მნიშვნელოვანი, რომ დავამთავრე უნივერსიტეტი, სამსახიობო ფაკულტეტი. გამკლავება, ალბათ, ამ პროფესიის უპერსპექტივობაა ჩვენს ქვეყანაში.
თუკი ფიქრობდით, რომ ჩვენს ქვეყანაში მსახიობებს არ აქვთ მომავალი, რამ გიბიძგათ ამ გადაწყვეტილებისკენ?
არ არის სასწავლებელი დაწესებულება სწორად აწყობილი, პედაგოგები არ უსმენენ სტუდენტებს, ხელის შეწყობა ნაკლებადაა. ასევე, ქვეყანაში, სადაც ეკონომიკური კრიზისია, იქ რთულია რაიმეს მოტივაცია გქონდეს, მით უმეტეს, როდესაც გარემოც ხელს არ გიწყობს.
ახალგაზრდა თაობა − ერის მომავალი მის გარეშე წარმოუდგენელია. ფასეულობები, რომლითაც უნდა იყოს ნასაზრდოები მათი სულისკვეთება…
ახალგაზრდა თაობა − ეს არის უკეთესი მომავალი, ახალი ცნობიერებით, სიახლეებით, სწრაფვებით, საკუთარი პასუხისმგებლობის შეგრძნებით, მეტი ჰუმანურობითა და თანაგრძნობით ერთმანეთის მიმართ.
ჩემი თვალსაზრისით, ჰუმანურობა არის ის, რაც ყველაზე მეტად გვაკლია. თქვენი აზრით, როგორ უნდა მივიდეთ აქამდე?
ასე რთულია თქმა. ალბათ, გულწრფელად უნდა გვაინტერესებდნენ გარშემომყოფები.
რა მოგწონთ და რა არ მოგწონთ დღევანდელ საზოგადოებაში?
დღევანდელ საზოგადოებაში არ მომწონს პოზირება, ასევე, ფასეულობების ნაკლებობა და ზედაპირულობა.
ქართული ტრადიციების მიმართ როგორია თქვენი დამოკიდებულება?
არ ვიცი, რომელ ტრადიციებზეა საუბარი, მაგრამ იმ ტრადიციების მიმართ, რომლებიც დამახინჯებულია, დამოკიდებულებაც ნეგატიურია. ყველა ტრადიცია, რომელიც დამახინჯებულია, იწვევს ნეგატიურ დამოკიდებულებას.
თუმცა, მე დამახინჯებული მხოლოდ ტრადიციები არ მიგულისხმია. რუსეთ-უკრაინის მიმართ თქვენი განწყობები და მოლოდინი როგორია, როგორც ახალგაზრდა თაობის წარმომადგენლის?
ეს არის თემა, რომლის არსებობა და სისასტიკე ენით აღუწერელია ჩემთვის.
თქვენი აზრით, დანაშაული უფრო მეტია თუ სასჯელი, რომელიც სინდისის ქენჯნითაა ნასაზრდოები?
ორივე გავათანაბროთ.
ბულინგის თემასაც მინდა შევეხო. ჩემს ბავშვობაში ამ ტერმინს არ ვიყენებდით. იქნებ უშუალოდ ტერმინებმა დაამკვიდრეს უღირსი ქცევები? გიფიქრიათ ამაზე?
ან იქნებ უღირსმა ქცევებმა დაამკვიდრა ტერმინები?..
როგორია საქართველო, რომელშიც გსურთ 30 წლის შემდეგ იცხოვროთ…
მინდა, უბრალოდ, მშვიდად ვიცხოვროთ ადამიანებმა, სტაბილურობის განცდით.
ის, რაც არ მოგწონთ ძველ თაობაში, და რაც გენატრებათ დღევანდელ ურთიერთობებში…
ძველ თაობაში არ მომწონს ქსენოფობია. დღევანდელ ურთიერთობებში მონატრების განცდა არ მაქვს.
„ახალი თაობა“ − რას ნიშნავს თქვენთვის ეს შესიტყვება?
უკეთესი მომავლის პერსპექტივას.
ახალგაზრდებისთვის არის თბილისი გართობის, სიმშვიდის, სიყვარულის ქალაქი? როგორ აღიქვამთ თქვენ ამას, საინტერესოა…
პირადად ჩემთვის არა. ბევრი რამ არ მომწონს, დღემდე ვერ ვეგუები აქაურ ქაოსურ სიტუაციებს, ყველაფერი თავდაყირაა, ამიტომ თავშესაფარს თბილისის გარეთ ვეძებ ხოლმე.
საყვარელი საქმიანობა. ასე ვთქვათ, ჰობი…
ცხენით ჯირითი.
ფოტო: ლაშა ღუღუნიშვილი
პროექტის ავტორი: ნიკა გომართელი
ტექსტი: მარიამ გაბედავა
