რა მნიშვნელობა აქვს თქვენს სასიცოცხლო სივრცეში მცენარეებს?
ცხოველებიც და მცენარეებიც სწორედ იმ ჰარმონიის შექმნაში ერთ-ერთი ყველაზე მნიშვნელოვანია, მათი მოვლა კი მგონია, რომ ჩვეულებრივი თერაპიაა. მათთან ერთად ცხოვრებაც თერაპია და დიდი სიამოვნებაა. ჩვენ აგრეთვე ეზოს მცენარეებით ტკბობის საშუალებაც გვაქვს.
დეკორზე მუშაობისას რა გიქმნით ყველაზე დიდ კომფორტს? რა არის პრიორიტეტული და რას ურჩევდით ადამიანს, რომელიც ახლა აწყობს სახლს?
სახლი უნდა შეიყვარონ. ჰაერი, რომელიც სახლშია, უნდა იყოს სუფთა. პირადად ჩემთვის, სუნამოს სუნზე უფრო მნიშვნელოვანი სახლის სუნია. ასევე ერთ-ერთი ყველაზე მნიშვნელოვანია განათება, რომელიც ყოველდღიურობაში სჯობს იყოს დაბალი, თბილი განათებით და არა ჭაღით კარგად განათებული სივრცე. ხშირად შეგიძლიათ გამოიყენოთ სანთლებიც, რომელიც საღამოს საინტერესოს ხდის.
მთავარია სინათლე და მისი სწორი განაწილება. ხანდახან, სახლს, რომელსაც ფანჯრიდან ვხედავ, ვერ ვხვდები სახლია, ოფისი თუ ნოტარიუსი.
როგორია თქვენი იდეალური სახლი?
იდეალური სახლი არ ვიცი როგორია. მე მგონია, რომ როგორც ადამიანი იცვლის ტანსაცმელს, ვარცხნილობას, სახლსაც ხშირად სჭირდება მცირე ცვლილებები, რომელიც სულაც იგივე ნივთებით შეიძლება მოახერხოს. ჩემი სახლიც არ არის იდეალური − მუდამ რაღაც შესაკეთებელია და ცოტათი მიყვარს კიდეც ეს შეკეთების პროცესი.
რამ განაპირობა თქვენს შემოქმედებაში ფლორასა და ფაუნას მოტივი, რომელიც არავის ჰგავს და უნიკალურია?
ადამიანი ფლორასა და ფაუნას ნაწილია ¬− იმის, რაც გვაცოცხლებს, მოგვწონს, გვიყვარს. უბრალოდ, მე მგონი ბოლო დროს გადავამეტეთ რესურსის გამოყენებას და ბევრად მეტს ვითხოვთ სამყაროსგან. სწორედ ეგ არის ჩემი ერთგვარი პროტესტი, რასაც ჩემი შემოქმედების საშუალებით გადმოვცემ.
როგორ ახერხებთ ჰარმონიული სამყაროს შექმნას შინ, რომელიც ასეთი მნიშვნელოვანია შემოქმედებითი პროცესისთვის?
ვფიქრობ, სახლი უნდა გიყვარდეს. იქ ყველა და ყველაფერია, რაც შენ გიყვარს და ჰარმონიაც თავისით ჩნდება. სახლი შენი პატარა დედამიწაა, შენი ქვეყანაა, შენი მცირე კუნძულია და თუ ის არ გიყვარს, ქვეყანაც ვერ გეყვარება.
ტექსტი: ირმა შარიქაძე
