Sopo Iosebidze ქართული ბრენდია, რომელიც უკვე მრავალი წელია საზოგადოების წინაშე გამოჩნდა და მომხმარებელს ნატურალური ქსოვილებისგან შექმნილ ძალიან დახვეწილ სამოსს სთავაზობს. ნამუშევრებში ხშირად შეხვდებით ქართულ მოტივებზე შექმნილ ნაქარგებს, რომლებიც ბრენდს ხდის უნიკალურს და ინდივიდუალიზმს სძენს. OK! Fashion Book გთავაზობთ ინტერვიუს დამფუძნებელ სოფო იოსებიძესთან, რომელიც უფრო ვრცლად გვიამბობს ბრენდის საქმიანობის შესახებ.
უპირველესად გაგვეცანით…
დავამთავრე იაკობ ნიკოლაძის სახელობის სამხატვრო კოლეჯი, ტანსაცმლის მოდელირების განხრით, შემდეგ შოთა რუსთაველის სახელობის უნივერსიტეტში – სანახაობათა გაფორმება, კინო და თეატრი.
მესამე კურსიდან ვმუშაობ. კინოს მიმართულებით ვარ კოსტიუმების მხატვარი და გარკვეულ დიდ ღონისძიებებზე – დამდგმელი მხატვარი.
ასევე მაქვს საკუთარი ატელიე @silkfactorystudio, სადაც ვქმნი სამოსს, როგორც ინდივიდუალური მომსახურების, ისე საკუთარი ხაზისთვის და, რა თქმა უნდა, სხვადასხვა შოუსა თუ ფილმისთვის. იქმნება სხვადასხვა ეპოქა თუ გმირის საინტერესო კოსტიუმი. აქვე, ჩვენს სივრცეში არის დიდი გარდერობი, სადაც ინახება სხვადასხვა ეპოქიდან გაცოცხლებული ამა თუ იმ გმირის მრავალი კოსტიუმი.
სოფო, გვიამბეთ ბრენდის შესახებ. რამდენი ხანია ბაზარზე გამოჩნდა და საიდან გაჩნდა იდეა?
ჩვენი ბრენდი ბაზარზე 2010 წლიდან არის წარმოდგენილი.
თავდაპირველად მომხმარებელს ვთავაზობდით ინდივიდუალურ მომსახურებას, სათითაოდ ყველას მათი ფიგურისა და მოთხოვნის შესაფერის ესკიზს ვუქმნიდით და მორგების შემდეგ ინდივიდუალურად ვკერავდით სამოსს. ვახდენდით დეტალიზაციას ხელნაკეთი აქსესუარებითა და სხვადასხვა გაფორმებით.
წლების განმავლობაში, მომხმარებლის მატებასთან ერთად, შეიქმნა ხაზი – @sopoiosebidze, რომელიც უკვე საშუალებას აძლევდა მომხმარებელს, მზა სამოსი შეეძინა.
დღეს ბრენდი sopoiosebidze, დიდი მოთხოვნიდან გამომდინარე, მთელ საქართველოში იყიდება ონლაინმაღაზიის საშუალებით, რაც მთავარია, ნებისმიერი ზომა და ფერი. გარკვეული ლიმიტირებული კოლექციები კი საზღვარგარეთაც აქტიურად გადის და თითქმის ყველა ქვეყანაში გვყავს მომხმარებლები.
რას სთავაზობთ საზოგადოებას?
საზოგადოებას ვთავაზობთ განსხვავებულ, ნატურალური ქსოვილებისგან შექმნილ სამოსს, რომელიც არის სადა და ამავდროულად დახვეწილი.
არ მიყვარს ზედმეტი დეტალებით გადატვირთული არც კონსტრუქცია და არც ტექსტილი.
ვმუშაობ აბრეშუმით, ბამბით, ფარჩით, ხავერდით, ტილოთი და სხვა ქსოვილით.
მიყვარს დავიწყებული ძველის განახლება როგორც თარგებში, ისე გაცოცხლება ნაქარგებით, აპლიკაციითა თუ სხვა დეტალებით.
ჩემთვის ძალიან ფასეულია, შესაბამისად, ხშირად გადაგვაქვს ხელით შესრულებული სხვადასხვა ნამუშევარი სამოსზე მინიმალისტური სტილისტიკით. მაგალითად, პერანგზე ხელით ნაქარგი დეტალი, ბლუზაზე აპლიკაცია, ტყავის დეტალები და სხვა.
ძალიან ხშირად ვქმნი კონცეპტუალურ სამოსს. მიყვარს სადა, მაგრამ განსხვავებული ჭრები და ხაზები.
რას სთავაზობთ მომხმარებლებს გაზაფხულის სეზონისთვის?
გაზაფხულის კოლექცია შედგება ახალი, განსხვავებული პიჯაკითა და მოსაცმელით, რომელშიც ჟილეტი და მოსაცმელი ერთადაა გაერთიანებული.
აქტუალურია ორეულები, პერანგები ნაქარგებით, ლაბადები. გამოვიყენეთ როგორც ტილო, ისე ხავერდი და ველვეტი.
რა მიგაჩნიათ ბრენდის ნიშად?
ბრენდის ნიშა სადა, კომფორტული და ყველასგან განსხვავებული სამოსია, რომელიც ბუნებრივი მასალებისგანაა შექმნილი.
სამოსში არამარტო დიზაინს და ტექსტილს ვაქცევთ უდიდეს ყურადღებას, ასევე დიდ დროს ვუთმობთ დამუშავებას, ეს ჩემთვის პრინციპულად მნიშვნელოვანი კრიტერიუმია.
როგორია ბრენდის სამომავლო გეგმები?
უახლოეს მომავალში ჩვენს მომხმარებელს შევთავაზებთ ახალ ხაზს – Home-ს, რაზეც უკვე ვმუშაობთ და მალე იხილავთ. დავამატებთ ძველქართულ მოტივებზე შექმნილ სასაჩუქრე ყუთებსა და სახლის აქსესუარებს.
შორეულ გეგმებში ფეხსაცმლისა და ჩანთების ხაზის დამატებაც მოიაზრება.
Photography: Bekajokharidze
Photography assistant: mariamfiskur
მოდელი: მარიამ სანოგო
ნინი ციხელაშვილი
