ქართული მოდის სახლი T&N Darchia ქართულ ბაზარზე 2017 წლიდან ოპერირებს და წარმოდგენილია ორ ქალაქში – თბილისსა და ბათუმში. მისი დამფუძნებლები დები, თათია და ნათია დარჩიები არიან, რომლებიც წლების განმავლობაში მომხმარებლების კმაყოფილებაზე არიან ორიენტირებულნი და მუდმივად განსხვავებული და ორიგინალური დიზაინის სამოსს სთავაზობენ მათ.
1, 2 და 3 ივლისს თბილისის სხვადასხვა ლოკაციაზე ახალბედა და უკვე წარმატებული კარგად ნაცნობი ქართველი დიზაინერების შოუები გაიმართა, რომლის მონაწილეც, რასაკვირველია, T&N Darchia-ც გახლდათ.
სეზონის თემატიკა REBORN OF FASHION – ქართული მოდის სფეროს ხელახლა დაბადებას, გადაფასებას და ახალი ენერგიის გამოღვიძებას გულისხმობს. პანდემიის პერიოდის დიდი პაუზის შემდეგ უამრავი ახალი სახე გამოჩნდა, რომლებსაც აღმოჩენა და პოპულარიზაცია სჭირდებათ. ჩვენებებზე წარმოდგენილი იყო არა მხოლოდ სამოსი, არამედ სხვადასხვა აქსესუარი და ფეხსაცმელები.
ფესტივალის ფარგლებში T&N Darchia-მ წარადგინა ახალი კოლექცია, რომელიც ახალი ინოვაციური ტექნოლოგიით არის შექმნილი. აღსანიშნავია, რომ ეს იდეა სწორედ მათ ეკუთვნით. ინსპირაცია კი ძველბერძნული ტიპის მოოქრული დეტალები გახლდათ, რამაც კიდევ უფრო ელეგანტური და მდიდრული იერსახე შესძინა მათ მიერ წარმოდგენილ სამოსს.
ფესტივალის ჭრილში ერთმანეთს დაუკავშირდა არა მხოლოდ დიზაინერი და აუდიტორია, არამედ უამრავ მოდელს, ვიზაჟისტს, ჟურნალისტს, ბაიერს, სტილისტს მიეცა საშუალება, დაახლოებულიყვნენ, ერთმანეთი გაეცნოთ და სამომავლო გეგმები შეედგინათ. ფესტივალმა წელს ქართველ ფოტოგრაფებსა და არტისტებთან კოლაბორაციაც გადაწყვიტა, შესაბამისად, აუდიტორიამ იხილა ქართველი ფოტოგრაფების უნიკალური ნამუშევრები მოსაწვევებზე, სივრცეების დიზაინსა და სოციალურ პლატფორმებზე.
ტექსტი: ციაკო ღამბაშიძე
ფოტო: ლევან ყანდაშვილი
