#OK! საპნის ჯადოსნური საწარმო „საპონერია“

საპონერია საქართველოში პირველი გამჭვირვალე საწარმოა, სადაც საპნები და კოსმეტიკა ბუნებრივი ინგრედიენტებისა და თანამედროვე ტექნოლოგიების შეზავებით მზადდება, თვითონ მაღაზია კი, სურნელოვანი ყვავილებით სავსე, ხასხასა მდელოს მოგაგონებთ. სტუმრობისას, გარემოთი ტკბობის გარდა, საპნების დამზადების ულამაზესი პროცესის ნახვა, ადგილზე დატესტვა და შეძენამდე პროფესიული კონსულტაციის მიღებაც შეგიძლიათ.

ბრენდი 2017 წელს დაარსდა, თუმცა მთავარი ღირებულებები უცვლელია − ადამიანებისთვის დადებითი ემოციებისა და ბედნიერების მინიჭება. „საპონერიას“ მზრუნველი „ფერიები“ ამას ყველა შესაძლო გზით აკეთებენ − იქნება ეს დახვეწილი საჩუქრების შეფუთვა, კანის სხვადასხვა პრობლემის მოგვარება თუ შენაძენზე გაკეთებული საჩუქარი საპნის ტესტერების სახით, რომელიც მაღაზიის ყველა სტუმარს ერგება სახსოვრად.

„საპონერიას“ ისტორიის დაწერა სამედიცინო ცოდნითა და უშრეტი ენთუზიაზმით დაიწყო, ინტერესი ჰობიდ იქცა, ჰობი საქმედ, საქმე კი − წარმატებულ საწარმოდ, სადაც ამჟამად 8 ადამიანია დასაქმებული, უკვე ერთი მიზნის გარშემო გაერთიანებულნი, რათა კოსმეტიკის ინდუსტრია უფრო ეთიკური და ეკოლოგიური გახდეს. დიდი ყურადღება ეთმობა პლასტმასის გამოყენების მინიმუმამდე დაყვანას, ინოვაციური პროდუქტების შექმნას, რომლებიც არ საჭიროებენ ბოთლებსა და ქილებს. „საპონერიას“ მთავარი პრინციპი ურთიერთგაცემა და მზრუნველობაა, რაც არა მხოლოდ ადამიანებსა და ბრენდს შორის, არამედ ბრენდებსა და ბუნებას შორისაც უნდა არსებობდეს.

„საპონერიას“ უკეთ გაცნობა მის ინსტაგრამ-გვერდზე შეგიძლიათ, სადაც ისეთივე ზღაპრული გარემო დაგხვდებათ, როგორიც მაღაზიაშია. რაც მთავარია, დამზადების პროცესის სასიამოვნო ვიდეოები და საინტერესო კონტენტი არ მოგაკლდებათ.

ბევრი რომ აღარ გავაგრძელოთ, თუ თბილისის შუაგულში სეირნობისას, სასიამოვნო სურნელმა და საპნის ბუშტებმა ყვავილებიან მდელოსთან მიგიყვანათ, შეისეირნეთ − შესაძლოა, ვიტრინის მიღმა, „საპონერიას“ „ფერიები“ სწორედ თქვენთვის ამზადებდნენ რაიმე განსაკუთრებულს.