ჟურნალი OK! გიამბობთ პრემიუმ კლასის საერთაშორისო სასტუმრო „პულმანის“ შესახებ, რომელიც თითქმის სამი წელია ოპერირებს ქართულ ბაზარზე და მომხმარებლებს მრავალფუნქციურ სივრცეს სთავაზობს, სადაც მათ შეუძლიათ როგორც დასვენება და განტვირთვა, ასევე მუშაობა მყუდრო გარემოში. სასტუმრო უნიკალური მდებარეობითა და არქიტექტურით გამოირჩევა, რაც სტუმრებისთვის ერთ-ერთი მთავარი სავიზიტო ბარათია. მაშ ასე, გთავაზობთ ინტერვიუს „პულმანის“ გაყიდვების დეპარტამენტის დირექტორთან, ეკა პატარაიასთან, რომელიც უფრო ვრცლად და დეტალურად გვიამბობს სასტუმროს კონცეფციისა და უპირატესობების შესახებ.
„პულმანი“ უკვე რამდენიმე წელია ქართულ ბაზარზე ოპერირებს. რა გზა გაიარა სასტუმრომ ამ წლების განმავლობაში?
ჩვენი სასტუმრო ივნისში 3 წლის გახდება, თუმცა კოვიდპანდემიამ სასტუმრო „პულმანის“ გახსნას ხელი ძალიან შეუშალა და დაგეგმილზე ბევრად გვიან გავხსენით. პირველი წელი, რა თქმა უნდა, რთული იყო. ისედაც ახალგახსნილ დიდ სასტუმროს ამუშავება საკმაოდ უჭირს, ჩვენ კი პოსტკოვიდურ პერიოდში გავხსენით, როდესაც დახურულ სივრცეში შეკრებები და მთლიანად ტურიზმი მინიმალურ მაჩვენებელზე იყო. ჩვენი გაყიდვებისა და მარკეტინგის გუნდის ჩართულობით, მალევე გახდა სასტუმრო პოპულარული და ბაზარზე საკუთარი ადგილი წარმატებით დაიმკვიდრა. ბოლო რამდენიმე თვეა, ისევე როგორც ყველა დიდ სასტუმროში, ჩვენთანაც შეინიშნება ტურისტების ნაკლებობა ქვეყანაში არსებული პოლიტიკური სიტუაციიდან გამომდინარე.
რა სახის მომსახურებებს სთავაზობთ მომხმარებლებს?
ბრენდი Pullman-ი ადგენს მოგზაურობისა და ცხოვრების ახალ სტანდარტებს და სტუმრებს სთავაზობს ზუსტად ისეთ სივრცეს, როგორიც მათ სჭირდებათ სამუშაოსთვის, გართობისა და შთაგონებისთვის. სასტუმრო ბრუნავს Work Hard-Play Hard-ის მთავარი კონცეფციის გარშემო. იგი აერთიანებს ლოფტის სტილის 215 ოთახს, 2 000 კვადრატულ მეტრზე გადაშლილ ერთ-ერთ უდიდეს საკონფერენციო სივრცეს თბილისში, თანამედროვე სპორტულ დარბაზს და 25-მეტრიან აუზს, ფრანგულ რესტორან Dumas-ს და ქალაქში ყველაზე მაღალ, 37-ე სართულზე მდებარე ბარს – Weather Report-ს. თითოეული დეტალი ჩვენი სტუმრებისთვის უნიკალური გამოცდილების შექმნაზეა გათვლილი.
რა უპირატესობებით სარგებლობს სასტუმრო ქართულ ბაზარზე?
პირველ რიგში, მინდა აღვნიშნო თვითონ კომპლექსი. ობიექტური ვიქნები, თუ ვიტყვი, რომ ყველაზე ლამაზი და გამორჩეული შენობაა მთელ საქართველოში. ეს, რა თქმა უნდა, იზიდავს სტუმრებს და თბილისის ერთ-ერთი სავიზიტო ბარათი გახდა. ორი დახვეული ცათამბჯენი თბილისის ცენტრალურ უბანში, უნიკალური მდებარეობითა და არქიტექტურით, სრულად პასუხობს ბრენდ Pullman-ის კონცეფციას. აქ ნახავთ ოფისებს, საკონფერენციო დარბაზებს და სასტუმროს ნომრებს, ისევე როგორც სრულიად უნიკალურ რესტორანსა და ბარს შენობის ბოლო ორ სართულზე.
ამავდროულად, საერთაშორისო დონის მაღალი ხარისხი ერთ-ერთი მთავარი მამოძრავებელია. მრავალი ტრენინგის, გადამზადებისა და მკაცრი გაიდლაინების საფუძველზე ჩვენ ვქმნით სერვისის მაღალ სტანდარტს.
ჩვენ ასევე ვცდილობთ შემოვიღოთ მდგრადი განვითარებისა და ეკომეგობრული პრაქტიკები. სასტუმროში მთლიანად ამოღებულია ერთჯერადი გამოყენების პლასტმასის მასალები და პროდუქტები, აქტიურად ვმუშაობთ საკვები ნარჩენების შემცირებასა და წყლის კონსერვაციაზე. აღნიშნული პრაქტიკებიდან გამომდინარე, წელს მივიღეთ საერთაშორისოდ აღიარებული Green Key Certificate-ი, რომელიც აღიარებს მდგრადი ტურიზმის უმაღლეს სტანდარტებს და ადასტურებს ჩვენს ჩართულობასა და ერთგულებას გარემოსდაცვითი პასუხისმგებლობის, ეკომეგობრული პრაქტიკებისა და მდგრადი ბიზნესის განვითარების მხრივ.
„პულმანი“ აქტიურად არის ჩართული MICE ინდუსტრიის კუთხით ქვეყნის წარმოჩენასა და პოპულარიზაციაში. გვიამბეთ ამის შესახებ უფრო ვრცლად.
თამამად შემიძლია ვთქვა, რომ ჩვენი საკონფერენციო სივრცე ერთ-ერთი საუკეთესოა საქართველოს მასშტაბით. გვაქვს 700 მ2 ბოლრუმი, რომელიც იყოფა 3 ნაწილად და დამატებით 7 საკონფერენციო ოთახი. სივრცეები აღჭურვილია უახლესი ტექნოლოგიებით, საკმაოდ დიდი მისაღები სივრცითა და ტერასით. ასევე გვაქვს 215 ოთახი და აქედან 100 ოთახი არის 2-საწოლიანი. ამ ყველაფრის გათვალისწინებით, ჩვენთვის ძალიან მარტივია დიდი MICE ჯგუფების მასპინძლობა.
როგორია თქვენი ჩართულობა საქართველოში ტურიზმის განვითარების თვალსაზრისით?
ერთ-ერთ უმსხვილეს ფრანგულ ბრენდ Accor-ის ჯგუფში შემავალი პრემიუმ კლასის სასტუმრო Pullman Tbilisi Axis Towers-ის შემოსვლა საქართველოში საკმაოდ მნიშვნელოვანი ნაბიჯი იყო ქვეყნის ტურისტული მიმართულების განვითარებისა და წინსვლისთვის. საქართველო ძალიან მიმზიდველი ტურისტული მიმართულებაა უცხოელებისთვის. შესაბამისად, ჩვენი მხრიდან უმაღლესი დონის სერვისისა და განსაკუთრებული შთაბეჭდილებების შეთავაზება არის სასტუმროს წარმატების წინაპირობა და საქართველოში სერვისის დონის ამაღლება.
სამომავლო გეგმები გაგვიზიარეთ.
წინასწარ დეტალების გაჟღერებისგან ჯერ თავს შევიკავებ, თუმცა საკონფერენციო სივრცისთვის ერთ სიახლეს ვგეგმავთ, რომელიც კიდევ უფრო მოიზიდავს და გაამარტივებს დიდი ჯგუფების მასპინძლობას ჩვენს სასტუმროში. ამ ეტაპზე ვიტყვი იმას, რომ აქტიურად ვართ ჩართული სასტუმროსა და თვითონ ქვეყნის პოპულარიზაციაში, რაც გამოიხატება სხვადასხვა გამოფენაში მონაწილეობით, მრავალი საერთაშორისო მარკეტინგული კამპანიითა და ბევრი საინტერესო გასართობი ღონისძიებებით.
ტექსტი: ციაკო ღამბაშიძე
ფოტო: ალექსეი სეროვი
