„მინიმალისტი“ ქართულ ბაზარზე 2019 წლიდან ოპერირებს. უკვე ორ წელზე მეტია, რაც ბრენდი გამოჩნდა სოციალურ სივრცეებში და ამ მოკლე დროში უკვე ძალიან ბევრი ქალბატონის ნდობა დაიმსახურა, როგორც საქართველოში, ასევე მის ფარგლებს გარეთ. „მინიმალისტი“ ასევე ხელმისაწვდომია ონლაინ შოპინგ-მოლებში. ამ და სხვა უფრო მეტი დეტალის შესახებ, ჟურნალი OK! ბრენდის დამფუძნებელ ნანუკა ვეფხვაძეს ესაუბრა. ნანუკა 5 შვილის ახალგაზრდა დედაა, რომელიც დარწმუნებული ვარ, ძალიან ბევრი ქალბატონისთვის გახდება მოტივაციისა და ინსპირაციის წყარო.
რა არის თქვენი ძირითადი მიმართულება და რატომ?
„მინიმალისტის“ ძირითადი მიმართულება გახლავთ ქალის ფეხსაცმლის ხაზი, თუმცა გვაქვს ასევე ჩანთების მცირე კოლექცია (ამ ეტაპზე). ბრენდის პროდუქცია იკერება თბილისში, ერთ-ერთ მსხვილ საწარმოში, სადაც როგორც მე, ასევე იქ მომუშავე პერსონალი ყველაზე დიდ აქცენტს ვამახვილებთ ხარისხსა და კომფორტზე.
რა სახის მასალაზე მუშაობთ?
ბრენდის ხარისხს განაპირობებს მასალა, რომელსაც ვიყენებთ შეკერვის პროცესში. ეს გახლავთ ნატურალური ტყავი და ზამში.
გვესაუბრეთ ხარისხზე.
სანამ ჩვენი ნივთები მომხმარებლამდე მივა, ხარისხის კონტროლის უდიდეს გზას გადის. კონტროლდება როგორც მასალის, ასევე ხელობის ხარისხი, ფეხსაცმლის მდგრადობა და მისი კომფორტულობა.
რატომ Minimalist?
„მინიმალისტი“, როგორც ბრენდის სახელი, შევარჩიე მისი სტილის კონცეფციიდან გამომდინარე. მინდოდა სახელი პირდაპირპროპორციული ყოფილიყო ბრენდის მიმართულებასთან, ანუ მინიმალიზმთან, და მომხმარებელს ასოციაცია ჰქონოდა სისადავესთან. ასევე, „მინიმალისტი“, როგორც საერთაშორისო სახელი, რადგან ვგეგმავ ბრენდის უფრო ფართო მასშტაბზე გატანას. უპირველეს ყოვლისა, ჯერ ქართველ მომხმარებელს უნდა შევაყვაროთ თავი.
რა მიგაჩნიათ ბრენდის უპირატესობად?
ბრენდის უპირატესობა გახლავთ სადა, დახვეწილი დიზაინი, რომელიც არის როგორც ყოველდღიურად მოხმარებადი, ასევე განსაკუთრებული დღეებისთვის. ჩემი მიზანია, მომხმარებელმა, რომელიც შეიძენს „მინიმალისტს“, მაქსიმალურად კომფორტულად იგრძნოს თავი, რათა ეს პროდუქცია არ იყოს ნივთების იმ სიაში, რომელიც გარდერობში შენახვისგან დაიმტვერება და მივიწყებას მიეცემა. დიდი სურვილი მაქვს, როგორც დიზაინმა, ასევე ხარისხმა გაუძლოს დროს.
როგორია ბრენდის სამომავლო გეგმები?
სამომავლო გეგმებს რაც შეეხება, ვგეგმავ როგორც ფეხსაცმლის, ასევე ჩანთის ხაზში მოდელების აქტიურ წარმოებას და აქსესუარების ხაზის დამატებას. „მინიმალისტის“ შოურუმის მოწყობას − როგორც თბილისში, ასევე სხვა ქალაქებში, რათა უფრო მეტად ხელმისაწვდომი იყოს მომხმარებლისთვის.
FB: Minimalist
Insta: __minimalist__
