ტელე-წამყვანი და Glamour Georgia-ს მთავარი რედაქტორი თამთა კვარაცხელია ქართულ მოდას ახალ ელფერს სძენს, თავისი ბრენდით KVARA, რომელიც უკვე საერთაშორისო სცენაზე პოზიციონირდება.
ბრენდის ისტორია ბევერლი ჰილსში დაიწყო, სადაც თამთას მიერ შექმნილი სატესტო კაბა მსოფლიო მოდის სახლების ტოპ დიზაინერების მაღაზიაში მანეკენს მოარგეს. ქალაქის მაცხოვრებლები ავტომობილებს აჩერებდნენ და ინტერესით კითხულობდნენ, თუ რა ბრენდი იყო ეს. ასეთმა დიდმა ყურადღებამ ამერიკული კომპანიის დაინტერესებაც გამოიწვია, მათ თამთას ხედვა და გემოვნება ინსპირაციად გამოიყენეს და თანამშრომლობა შესთავაზეს. სწორედ ასე გაჩნდა იდეა ბრენდის შექმნის, რომლის პირველი ინვესტიციაც ამერიკული ბაზრიდან წამოვიდა.
თამთამ, მიუხედავად ამ ისტორიისა და შემოთავაზებისა გადაწყვიტა ბრენდის რეგისტრაცია საქართველოში:
,,მინდოდა KVARA-ს მეშვეობით ჩემი ქვეყანა გამეპიარებინა და საქართველო მოდის გლობალურ რუკაზე დამეყენებინა,“ – ამბობს ის.
პირველი ხაზის ნიმუშები ევროპელ ბაიერებს გადაეგზავნა, რომლებიც დღეს სხვადასხვა მოდურ მაღაზიებში კოლექციის განთავსებაზე მუშაობენ. ამერიკულმა პარტნიორმა კომპანიამ კი თამთას პირველი კოლექცია მთლიანად შეიძინა და ის ნიუ იორკის მოდის კვირეულზე მიიწვია. ასე დაიბადა KVARA ბრენდი, რომელიც უკვე მსოფლიო მოდის სცენისკენ მიიწევს.
როგორც თამთა აღნიშნავს, დიზაინერობაზე არასოდეს უფიქრია.
„მოდა დედამ შემაყვარა, ბავშვობიდან განსაკუთრებულად მაცმევდა და ყოველთვის ცდილობდა, რომ გამორჩეული ვყოფილიყავი. მიუხედავად იმისა, რომ დღეს არც ვხატავ და არც ვკერავ, ბავშვობაში ბებიასთან ერთად ჩემი თოჯინებისთვის სამოსს ვქმნიდი. ბებია შესანიშნავად ქარგავდა, მამიდა კი კერავდა, სახლში რამოდენიმე საკერავი მანქანაც კი გვქონდა. იმ პერიოდში ბევრს ვხატავდი მოდელებს სხვადასხვა სამოსში, ხატვაზეც დავდიოდი. მოგვიანებით ეს ყველაფერი დავივიწყე, სხვა პრიორიტეტები მქონდა და არასოდეს მიფიქრია, რომ ოდესმე ჩემს სამოსის ხაზს გავაკეთებდი.
დღეს კი ბიზნესისადმი ინტერესმა და მომწიფებუმა იდეამ მიმიყვანა იქამდე, რომ საკუთარი ბრენდი KVARA შემექმნა. ეს ჩემთვის ახალი გამოწვევა და პლატფორმაა, რომლის მეშვეობითაც საერთაშორისო ბაზარზე ვიმოქმედებ და ჩემს საგვარეულო სახელს კვარას გავაცნობ მსოფლიო მოდის ინდუსტრიას.
რაც შეეხება ბრენდის სპეციფიკას, თამთა ამბობს, რომ მისი ბრენდი თვითგამოხატვის საუკეთესო საშუალება იქნება.
„KVARA-ში გამოვხატავ ქართულ ხასიათს, თავისუფლების სიყვარულს. მომხმარებელს შევთავაზებ ტრენდულ, მაგრამ უნიკალურ სამოსს. ვინც KVARA-ს ჩაიცმევს, ის ავტომატურად უნიკალური გახდება, რადგან ეს ბრენდი თვითგამოხატვისა და საკუთარი გზის სიმბოლოა.”
