აშშ-ის ლუიზიანას შტატში მდებარე ქარხნის დირექტორი, გრეჰემ უოკერი, ნამდვილი სანტა კლაუსი აღმოჩნდა. მან თავის კომპანია Fibrebond-ი 1,7 მილიარდ დოლარად გაყიდა და აქედან 240 მილიონ დოლარი 540 თანამშრომელს გაუნაწილა – ინფორმაციას The Wall Street Journal ავრცელებს.
უოკერმა გადაწყვიტა, რომ კომპანიას მხოლოდ იმ მეწარმეს მიყიდდა, რომელიც შემოსავლის 15 პროცენტს ახალ თანამშრომლებს გადასცემდა. Fibrebond-ის თანამშრომლები აქციებს არ ფლობდნენ და იურიდიულად, ფული არ ეკუთვნოდათ. უოკერს უბრალოდ სურდა მათთვის გამოსამშვიდობებელი საჩუქარი გადაეცა და წაეხალისებინა, რომ მისი წასვლის მიუხედავად, წარმოებაში დარჩენილიყვნენ.
გარიგების დასრულების შემდეგ სრულ განაკვეთზე დასაქმებული 540 თანამშრომელიდან თითოეულს 443,000 აშშ დოლარი გადაეცა.
გრეჰემ უოკერის ყოფილმა თანამშრომლებმა დალუქული კონვერტები მიიღეს, რომლებშიც მათი ინდივიდუალური ბონუსის შესახებ შეტყობინება იდო. ზოგს ეს ხუმრობა ეგონა, სხვები თვალებს არ უჯერებდნენ. კომპანიის ვეტერანმა თანამშრომელმა, ლესია კეიმ, რომელმაც კომპანიაში მუშაობა 1995 წელს, საათში 5.35 დოლარის შემოსავლით დაიწყო, განაცხადა, რომ კონვერტის გახსნისას გაოგნებული დარჩა. უოკერის საჩუქარი მან იპოთეკური სესხის დასაფარად და ტანსაცმლის მაღაზიის გასახსნელად გამოიყენა.
კომპანია Fibrebond-ი 1982 წელს უოკერის მამამ, კლოდ უოკერმა ათ თანამშრომელთან ერთად დააარსა, რომლებიც ელექტრო და სატელეკომუნიკაციო აღჭურვილობისთვის ფარდულებს აშენებდნენ. კომპანიამ 1990-იან წლებში, ფიჭური კავშირის ბუმის დროს დიდი შემოსავალი მიიღო, 1998 წელს კი თითქმის მთლიანად გაკოტრდა, როდესაც ქარხანა დაიწვა. უოკერები თანამშრომლებისთვის ხელფასების გადახდას მაშინაც კი აგრძელებდნენ, როდესაც წარმოება შეჩერდა, რაც დღემდე ამ კომპანიის კულტურის ქვაკუთხედად ითვლება.
ასევე დაგაინტერესებთ
