ჟურნალი OK! -ს სტუმარი ყველასთვის ცნობილი მომღერალი ნათია დუმბაძეა. „ზოგჯერ სიმღერა მაშინ იბადება, როცა ყველაზე მეტად გჭირდება“ – სწორედ ასე აღწერს მომღერალი რამდენიმეწლიანი პაუზის შემდეგ შემოქმედებით სფეროში დაბრუნებას.
სიმღერა „ჩემი გულით“ როგორ გაჩნდა იდეის დონეზე – კონკრეტული სიტუაცია, ცხოვრებისეული გამოცდილება თუ იდეა?
ეს ყველაფერი სრულიად შემთხვევით და დაუგეგმავად მოხდა თიკა ფაცაციას კლიპის პრეზენტაციაზე, სადაც დიდი ხნის უნახავი მეგობარი, მუსიკოსი ლაზარე ადამია ვნახე. მან მითხრა, რომ სიმღერა ჰქონდა, რომელიც ძალიან მომიხდებოდა. მეც ეს შემოთავაზება დიდი სიხარულით მივიღე, რადგან იმ პერიოდში რაღაც ახალი მჭირდებოდა. მალევე დავიწყეთ მუშაობა და პირველივე მოსმენაზე მომეწონა, ძალიან მელოდიური სიმღერაა. მუშაობის პროცესში გარკვეული ცვლილებები შევიტანეთ, თუმცა ძირითადი მელოდია უცვლელი დარჩა.
თქვენ გქონდათ ორწლიანი პაუზა და სწორედ ამ პაუზის შემდეგ გამოვიდა ახალი სიმღერა. რას ეტყოდით მათ, ვინც მოუთმენლად ელოდა თქვენს დაბრუნებას?
საკმაოდ რთული დღეები გავიარე, შემიძლია კარმული პერიოდიც ვუწოდო. ხმის იოგებზე სერიოზული პრობლემა შემექმნა და საოპერაციოდ სტამბოლში გავემგზავრე. ერთი წლის განმავლობაში ვერ ვმღეროდი, ამას მოგვიანებით ჩემი ბენდის დაშლა დაემატა. პაუზა საკმაოდ დიდხანს გაგრძელდა, ჩემი და მასტერის ერთობლივმა სიმღერამ „არ უყურო დროს“ მსმენელის დიდი სიყვარული დაიმსახურა და აუდიტორია სხვადასხვა მომღერალთან ერთად ჩაწერილ დუეტებს ელოდებოდა. დავბრუნდი დიდი შემართებით და გაჩერებას აღარ ვაპირებ.
შემოქმედებითი გუნდი და კლიპის გადაღების პროცესი – რამდენად მნიშვნელოვანია თქვენთვის, როგორც არტისტისთვის, მუსიკალური შინაარსის ვიზუალური კუთხით გადმოცემა?
სიმღერა ისეთი შთამბეჭდავი გამოვიდა, რომ აუცილებელი იყო ღირსეული ვიზუალური გაგრძელება. ტექსტი სიყვარულზეა, რომელმაც თავისი გზა უკვე გაიარა და დასრულდა. სცენაზე მარტო ვდგავარ, რაც აწმყო დროის მანიშნებელია. კადრებად სიყვარულის ისტორიის ამსახველი წარსული მომენტებია ადამიანთან, რომელსაც ძალიან ლამაზად დავემშვიდობე.
როგორ იცვლებოდა სიმღერა პირველი დემოვერსიიდან საბოლოო ჩანაწერამდე?
ცვლილებების შეტანაში მე და ლაზარეს არაჩვეულებრივი მუსიკოსი და სიმღერის არანჟირების ავტორი, ზაზა ხუბუკელაშვილი დაგვეხმარა. კლიპის ავტორი ალექსანდრე ფურცხვანიძეა, მისი უდიდესი შრომის შედეგია არსებული კლიპი, ხოლო ტექსტის ავტორი უნიჭიერესი თემო საჯაია გახლავთ, რომელმაც სრულყოფილად, ზუსტი სტრუქტურითა და ღრმა შინაარსით გადმოსცა სიმღერის მთავარი სათქმელი. ძალიან დიდ მადლობას ვუხდი მთელ შემოქმედებით გუნდს.
რა იყო ყველაზე დიდი გამოწვევა ახალი ნამუშევრის შექმნისას?
სიმღერაზე მუშაობა დაახლოებით სამი თვე გაგრძელდა. სწორედ ამ პროცესმა მოიცვა ყველაზე მეტი დრო და მოითხოვა სიღრმისეული შრომა. რაც შეეხება კლიპს, მისთვის მრავალი განსხვავებული ლოკაცია იყო შერჩეული. კარგად დაკომპლექტებული გუნდითა და ინტენსიური მუშაობით, თითქმის შეუძლებელ ვადაში, დაახლოებით ორ კვირაში მოვახერხეთ გადაღებების დასრულება.
თქვენ გყავთ საკუთარი ბენდი Natia Dumbadze & Live Band. რამდენად დიდია სხვაობა ბენდთან ერთად ჯგუფურ მუშაობასა და სოლო შესრულებას შორის?
ახალი, ძალიან კარგი ბენდი მყავს, ზოგისთვის აქამდე ნაცნობი და ასევე უცნობი სახეებით. სიმღერის მარტო შესრულებას ყოველთვის ჩემს ძვირფას ადამიანებთან, ოთხ არაჩვეულებრივ მუსიკოსთან ერთად მუშაობა მირჩევნია. კორპორაციული საღამოებისა და კონცერტების ჩატარების დროს, სადაც სურთ, რომ მარტო ვიმღერო, ყოველთვის ბენდთან ერთად შესრულებას ვთავაზობ, რადგან მათთან ერთად სხვა ემოციით, ენერგიითა და განწყობით ვმღერი.
დაბოლოს, გაგვიზიარეთ სამომავლო, შემოქმედებითი გეგმები.
2026 წელს დაგეგმილი მაქვს 3 ახალი სიმღერის ჩაწერა სამ სხვადასხვა ძალიან კარგ კომპოზიტორთან ერთად. სავარაუდოდ, ერთ-ერთი ისევ ლაზარე ადამია იქნება, რომელმაც ეს სიმღერა დამიწერა. ლაზარე ასევე ჩემი ბენდის წევრია, რომელთანაც ხანგრძლივი თანამშრომლობა და ამას გარდა მეგობრული ურთიერთობა მაკავშირებს.
ტექსტი: ანო ბუხრაშვილი
ფოტო: ალექსეი სეროვი
