ლილიენ აგლაძისთვის ახალ სფეროში ძალების მოსინჯვა ერთგვარი გამოწვევა და ბავშვობის ოცნების ასრულება იყო. ბავშვობის ჰობი – ესკიზების ხატვა პროფესიად აქცია და შექმნა ტანსაცმლის ბრენდი „ლილიენი“. ბრენდის კოლექცია შთაგონებულია Old Money Aesthetic-ით, ეს არის სამოსი, რომელიც გამოირჩევა ელეგანტურობით, დახვეწილი და კლასიკური დიზაინით.
რა იყო ბრენდის შექმნის იდეა?
ბავშვობიდან მიყვარდა ესკიზების ხატვა. ჩემთვის ეს იყო ერთგვარი განტვირთვაც და ძიების პროცესიც. გერმანიაში გავიზარდე და იქ ჩავაბარე ეკონომიკურზე, თუმცა მალევე მივხვდი, რომ ეს პროფესია ჩემი არ იყო და უნდა მეკეთებინა ის, რაც სიამოვნებას მანიჭებდა და მიყვარდა. სწორედ ამიტომ დავუბრუნდი ისევ ჩემს ჰობის – ესკიზების ხატვას. ერთი წლის წინ კი გადავწყვიტე შემექმნა ჩემი სამოსის ხაზი „ლილიენი“.
რას სთავაზობთ საზოგადოებას?
მომხმარებელს ვთავაზობთ მაღალ ხარისხსა და ხელმისაწვდომ ფასს. „ლილიენის“ დახვეწილი დიზაინის სამოსი მაღალი ხარისხის ქსოვილებით მზადდება, როგორიცაა აბრეშუმი, ტილო და სალსა. ძირითადად კლასიკური სტილის სამოსია.
დიზაინს ვქმნი მე, თუმცა ვთანამშრომლობთ ატელიეებთან, რომლებიც უშუალოდ სამოსის შექმნაში მეხმარებიან.
რა გამოარჩევს „ლილიენის“ პროდუქციას ბაზარზე სხვა მსგავსი ნაწარმისგან?
გამოგვარჩევს ის განსაკუთრებული დიზაინი, რასაც მომხმარებელს ვთავაზობთ. მართალია მოთხოვნა უფრო აქტუალურ, ტრენდულ სამოსზეა, მაგრამ ვცდილობ ჩემი იდეებიც შევთავაზო საზოგადოებას. ჩემი ინსპირაცია კი Old money style-ა, რაც, ვფიქრობ, ნელ-ნელა უფრო ტრენდული ხდება საზოგადოებაში.
ასევე, ვცდილობთ კოლექციები იყოს მუდმივად განახლებული და მრავალფეროვანი.
თქვენი აზრით, ვინ არის „ლილიენის“ მომხმარებელი?
ძირითადად, ახალგაზრდა ქალბატონია, რომელმაც იცის რა უნდა და როგორ წარმოაჩინოს საკუთარი თავი.
ზოგადად, როდესაც ახალ კოლექციაზე ვმუშაობ, ვცდილობ მომხმარებელს კარგად დავანახვო და მივახვედრო, რომ ამ ბრენდის უკან დგანან ადამიანები, რომლებმაც ზუსტად იციან, თუ ვისთვის ქმნიან პროდუქციას.
ამჟამად სად შეუძლია მომხმარებელს თქვენი პროდუქციის შეძენა?
ჩვენი სამოსის შეძენა, ამ ეტაპზე, მხოლოდ ონლაინ არის შესაძლებელი, მაგრამ მალე ვგეგმავთ შოურუმის გახსნას, რათა მომხმარებელმა ადგილზე შეძლოს სამოსის მორგება.
სამომავლო გეგმები…
მომავალში გვინდა გავფართოვდეთ, ასევე უფრო მრავალფეროვანი არჩევანის საშუალება მივცეთ მომხმარებელს – შევთავაზოთ ახალი კოლექციები. სულ ახლახან დავიწყეთ მამაკაცის ხაზის წარმოებაც, რომლის ნახვაც ახალ კოლექციაში უკვე შესაძლებელია.
ტექსტი: სოფიო მალანია
ფოტო: ალექსეი სეროვი
