„OK! ბათუმის“ სტუმარი სტილისტი და ვიზაჟისტი, ეკა სურმანიძეა, რომელიც მიიჩნევს, რომ ზუსტად გესმოდეს მომხმარებლის, სწორად შეურჩიო ყველა ის პროცედურა, რაც მას ბედნიერს გახდის, დიდ სიამოვნებასთან ერთად, დიდი პასუხისმგებლობაცაა.
არაერთი ცნობადი სახე უცხადებს ნდობას, ამის დამსახურებად კი იმ გარემოს მიიჩნევს,
რაც ადამიანებს Ekas beauty house-ში ხვდებათ.
როდიდან დაიწყო თქვენი კავშირი სილამაზის სფეროსთან?
ყოველთვის მიზიდავდა, თუმცა სერიოზულად 13 წლის წინ, 2011 წლიდან დავეუფლე ვიზაჟისტისა და სტილისტის პროფესიას და მას შემდეგ ყოველდღიურ რეჟიმში ვცდილობ განვითარებას, ყველა იმ სიახლის გაცნობას და გათვალისწინებას, რაც აღნიშნულ სფეროში მნიშვნელოვანი და ტენდენციურია.
მოგვიყევით, როგორ გაჩნდა იდეა, გაგეხსნათ საკუთარი სილამაზის სალონი და რა გზა გაიარეთ იდეის განხორციელებამდე?
მარტივი გზა ნამდვილად არ გამივლია. წლების გამოცდილებამ და მომხმარებლის კმაყოფილებამ მოიტანა ფიქრი იმასთან დაკავშირებით, რომ გამეხსნა საკუთარი სილამაზის სალონი. ასეც მოხდა, რითაც ძალიან ბედნიერი და კმაყოფილი ვარ.
Ekas beauty house რა სერვისს სთავაზობს მომხმარებელს?
შეიძლება ითქვას, მრავალფუნქციური სალონი მაქვს, რომელიც მოიცავს საპატარძლო მომსახურების სრულ სერვისს. ვარცხნილობა, მაკიაჟი, წამწამის დაგრძელება, მანიკიურისა და პედიკიურის გაკეთება, ლაზერული ეპილაცია. ჩვენთან მოსულ მომხმარებელს ერთ სივრცეში შეუძლია მისთვის სასურველი ყველა პროცედურა მიიღოს.
თქვენს სალონს ხშირად სტუმრობენ ცნობადი სახეები, როგორ ფიქრობთ, რამ განაპირობა თქვენდამი მათი ნდობა?
პირველ რიგში, მეგობრულმა გარემომ. ასევე, ჩემთვის მნიშვნელოვანია მაღალი ხარისხის პროდუქციით მუშაობა. ვფიქრობ, ადამიანებისთვის სწორად შერჩეულმა მაკიაჟმა და ვარცხნილობამ განაპირობა ის, რომ დღეს ჩემს სალონს არაერთი ერთგული მომხმარებელი ჰყავს.
როგორია ლამაზი ქალის თქვენეული აღქმა?
ვფიქრობ, რომ სილამაზეს სტანდარტები არ აქვს და ყველა ქალი ლამაზია.
რომელ ცნობილ ვარსკვლავს ისურვებდით თქვენი სალონის სახედ?
მართალი გითხრათ, ამაზე აქამდე არ მიფიქრია, ახლაც ვერ გეტყვით კონკრეტულ სახელს. თუმცა, ალბათ ერთზე მაინც ვერ შევაჩერებ არჩევანს, რადგან ირგვლივ ბევრი ადამიანია, ვისაც სიამოვნებით ვისურვებდი ჩემი სალონის სახედ.
სამომავლო გეგმა…
წინასწარ არაფერს ვგეგმავ, დღემდე სპონტანური გადაწყვეტილებებით მოვედი. თუმცა, რაც დანამდვილებით ვიცი არის ის, რომ სფერო, რომელშიც წლებია ვმუშაობ, მაძლევს ინსპირაციას, კიდევ უფრო წინ ვიარო, რაც შეიძლება მეტი სასიამოვნო წუთები ვაჩუქო როგორც საკუთარ თავს, ისე ჩემ ირგვლივ მყოფებს.
