დღეს სოციალური ქსელები ისეთი აქტუალურია, როგორც არასდროს. ეს არის ადგილი, სადაც ხშირად სილამაზის სტანდარტს გვიწესებენ ან პირიქით − აღნიშნულ სტანდარტს ვანგრევთ. არაფერია ცუდი იმაში, რომ გვსურს გამოვიყურებოდეთ უფრო მოვლილად. ჩვენი დღევანდელი სტუმარიც სწორედ ასე ფიქრობს, რომ თავის მოვლასთან ერთად აუცილებელია არ დავკარგოთ ჩვენი ნამდვილი სახე და ინდივიდუალიზმი. ჟურნალი OK! უფრო ახლოს გაგაცნობთ ექიმ-ინიექციონისტ ბაია კონდრატიევას და მის ესთეტიკურ ცენტრს Entourage. ბაია ძალიან საინტერესო ადამიანია, საოცრად პოპულარულია სოციალურ სივრცეში, რადგან მას დიდ რეკომენდაციას უწევენ ქალები. ერთად გავიგოთ, თუ როგორ მოიპოვა ეს ნდობა ბაიამ და როგორია მისი სილამაზის ფილოსოფია.
ბაია კონდრატიევა, ექიმი-ინიექციონისტი: „ყველაზე მნიშვნელოვანი, რაც ადამიანებს გვაქვს, ინდივიდუალიზმია. ყველა პერსონაში არის რაიმე ლამაზი. წინააღმდეგი ვარ ფილტრების, რომლითაც ადამიანები საკუთარი თავის გადაკეთებას ცდილობენ. პაციენტებს ხშირად ვეუბნები: მთავარია ადამიანს ეტყობოდეს, რომ მოვლილია, თვალსაჩინოა, რომ ზრუნავს საკუთარ ვიზუალზე. მნიშვნელოვანია იყო ის, ვინც ხარ… მე ვცდილობ ადამიანებს დავეხმარო ინდივიდუალიზმის შენარჩუნებაში, რამდენადაც ეს შესაძლებელია“.
მნიშვნელოვანია სპეციალისტს ენდობოდე…
გეთანხმებით, ნდობა არის ყველაზე ძვირფასი, რაც მაქვს. ექიმისთვის ეს ყველაზე დიდი მონაპოვარია. ამ ნდობის შენარჩუნება რთულია, მაგრამ ვცდილობთ გავუფრთხილდეთ მას და არ გავუცრუოთ იმედი და მოლოდინი ჩვენს მომხმარებლებს.
როგორია თქვენი თავის მოვლის რუტინა?
ჩემი რუტინა არის ძალიან მინიმალისტური − დასაბანი საშუალება და კრემ-საცხი. ბრენდების დასახელებისგან თავს შევიკავებ, რადგან თავის მოვლის საშუალებები ინდივიდუალურად უნდა შეირჩეს. ის, რაც შეიძლება ჩემთვის იდეალური აღმოჩნდეს, შესაძლოა სხვას არც მოუხდეს. მრავალსაფეხურიანი რუტინის მომხრე არ ვარ, ჩემთვის საკმარისია სახის კანის დაბანა ფუნდამენტურად და დამატენიანებელი საცხი. რა თქმა უნდა, მზიან ამინდებში აუცილებლად ვიყენებ მზისგან დამცავ საცხს.
გვესაუბრეთ თქვენს ესთეტიკურ ცენტრზე…
Entourage სრულიად კონკურენტუნარიანია ბაზარზე. ეს არის ადგილი, სადაც დაგხვდებათ პროფესიონალთა გუნდი, რომლისთვისაც პაციენტთან გულწრფელი მიდგომა უმთავრესია. ჩემი კლინიკის უპირატესობაზე საუბარი არ მიყვარს − ჩემი აზრით, ჩვენს უპირატესობაზე ჩვენმა მომხმარებელმა უნდა ისაუბროს. შრომისმოყვარეობა, გუნდური მუშაობა და პროფესიონალთა გუნდი − ეს არის, რასთანაც გვინდა „ანტურაჟი“ ასოცირდებოდეს.
რა სახის პროცედურებს სთავაზობთ მომხმარებლებს?
უპირველესად გამაახალგაზრდავებელ პროცედურებს, როგორიც არის: ბიორევიტალიზაცია, მეზოთერაპია, ასევე, ბოტოქსი, ფილერი − ყველა ის პროცედურა, რომელიც ინიექციებით ტარდება. ასევე კლინიკაში გვყავს დერმატოლოგი, რომელიც უშუალოდ დერმატოლოგიურ ნოზოლოგიებზე მუშაობს − სახის წმენდა, პილინგი და სხვ.
რაც ყველაზე მნიშვნელოვანია, მომხმარებელს ჩვენთან შეუძლია ლაზერული ეპილაციის გაკეთება, რომელიც გერმანული კონფიგურაციის „იუს ქეა“-აპარატით ტარდება და გვაქვს ძალიან კარგი შედეგები.
უფრო კონკრეტულად მოგვიყევით აღნიშნული ლაზერული აპარატის შესახებ…
ნათია იარაჯული, ლაზეროთერაპევტი: ჩვენს კლინიკაში წარმოდგენილია გერმანული კონფიგურაციის „იუს ქეა მაქს პრო“ ბრენდის ლაზერული ეპილაციის აპარატი, რომელსაც აქვს გაგრილების უახლესი სისტემა და გახლავთ სრულიად უმტკივნეულო. სხივი სრულიად უსაფრთხოა, სითბური ტალღა აღწევს მხოლოდ თმის ფოლიკულში და იწვევს ფოლიკულის სტრუქტურის რღვევას, შედეგი კი თვალსაჩინოა პირველსავე პროცედურის შემდეგ.
ნინო კახიანი, ლაზეროთერაპევტი: 3 თვეა, რაც ამ აპარატით ვმუშაობთ და შედეგებმა მოლოდინს გადააჭარბა − 2-3 პროცედურაში, ფაქტობრივად, არასასურველი თმის 70-80 პროცენტი ქრება. პროცედურა ტარდება გაპარსულ ზონაზე და გამეორება სასურველია 21-დღიანი ინტერვალებით. ეფექტურია ნებისმიერი სტრუქტურის თმაზე, გარდა ჭაღარა თმისა.
სამომავლო გეგმები…
ჩემი ერთადერთი გეგმა არის ბევრი კმაყოფილი პაციენტი და საკუთარი თავის მუდმივად განვითარება. არ უნდა გაჩერდე, ყოველთვის ორიენტირებული უნდა იყო, რომ გაიზარდო.
ტექსტი: სოფიო მალანია
ფოტო: ალექსეი სეროვი
