გერმანიაში, ახალი წლის ღამეს აეროპორტები მოულოდნელად, ძაღლების თავშესაფრებად იქცნენ. ჟურნალ Green Me Mag–ის მონაცემებით, კიოლნ-ბონის აეროპორტმა ფეიერვერკების ხმაურით შეშინებული ძაღლებისთვის თავისი ტერმინალი, როგორც მშვიდი დასასვენებელი სივრცე გახსნა. სქელი ბეტონის კედლები და მრავალფენიანი მინა ხმაურს ახშობდა და მშვიდ გარემოს ქმნიდა, სადაც პატრონებსა და მათ ძაღლებს შეეძლოთ ღამე აფეთქებებისგან გამოწვეული სტრესის გარეშე გაეტარებინათ.
MSN News-ის ინფორმაციით, გერმანიის აეროპორტები ახალი წლის ღამეს ძაღლების მფლობელებს შორის დიდი პოპულარობით სარგებლობენ, რადგან აეროპორტების ტერიტორიაზე ფეიერვერკების გამოყენება აკრძალულია. ეს მათ ქალაქების ცენტრთან შედარებით მშვიდ ადგილად აქცევს და უსაფრთხო თავშესაფარს სთავაზობს ცხოველებს, რომლებიც სხვა შემთხვევაში, ღამეს სტრესში და კანკალში გაატარებდნენ.
31 დეკემბერს, ფეიერვერკებით შეშინებულ ძაღლებს კარი პადერბორნ-ლიპშტადტის აეროპორტმაც ფართოდ გაუღო.
იმ დროს, როცა ქალაქის ცა ფეიერვერკებისგან გუგუნებდა, აეროპორტის თანამშრომლებმა ხმაურისგან თავისუფალი სივრცე შექმნეს და ოთხფეხა მეგობრები შეიფარეს.
ამ ღამეს ნებისმიერ გამვლელს შეეძლო აეროპორტში თავის ძაღლთან ერთად მისვლა და ხმაურის დასრულებამდე, მშვიდ გარემოში დასვენება. ღონისძიებას ერქვა „დუმილი ფეიერვერკების ნაცვლად“, რადგან ბევრი ცხოველისთვის ახალი წელი დღესასწაული კი არა, სპეციალური ეფექტებით მოწყობილი აპოკალიფსი და უზარმაზარი სტრესია… ისინი ვერ ხვდებიან რატომ ცდილობენ ადამიანები ყოველ წელს, ზუსტად შუაღამისას პლანეტის აფეთქებას.
ხმაურით სავსე მსოფლიოში, სადაც ყველა სადღაც მიიჩქარის, ზოგჯერ განსაკუთრებულად ძვირფასია ადგილი, სადაც უბრალოდ მშვიდად სუნთქვა შეიძლება.
ასევე დაგაინტერესებთ
#OK! მამაკაცმა მოხუცი მშობლები 160 კილომეტრის მანძილზე ზურგით ატარა
