ჟურნალი OK! ქართულ ბრენდ Naniko Rodonaia Jewellery-ის გაგაცნობთ, რომელიც საზოგადოებას დახვეწილი და გამორჩეული სამკაულების მრავალფეროვან არჩევანს სთავაზობს. ბრენდმა ძალიან მოკლე დროში შეძლო და დაიმკვიდრა საკუთარი ნიშა, რომელიც გამოირჩევა გამოყენებული მასალების მრავალფეროვნებით და განსაკუთრებული სტილით. როდის დაარსდა, რა ტიპის სამკაულს სთავაზობს საზოგადოებას, სად შეგვიძლია შეძენა და სხვა საინტერესო თემების შესახებ, ბრენდის დამფუძნებელი და სამკაულების ავტორი − ნანიკო როდონაია გვიამბობს.
ნანიკო, როდის დააფუძნეთ ბრენდი?
თავდაპირველად, 6 წლის წინ, ტანსაცმლის ბრენდი „ბასკა“ დაფუძნდა, რომლისთვისაც ხელნაკეთ სამოსს ვქმნიდი, თუმცა 3 წლის შემდეგ გადავწყვიტე სამკაულების წარმოებით გამეგრძელებინა მუშაობა და რებრენდინგის შედეგად, წარმოების მიმართულებასთან ერთად, მისი სახელწოდებაც შეიცვალა. დღეს, Naniko Rodonaia Jewellery-ით ვართ წარმოდგენილნი ბაზარზე.
რა ტიპის სამკაულს სთავაზობთ საზოგადოებას და ვინ არიან თქვენი ძირითადი მომხმარებლები?
Naniko Rodonaia Jewellery ერგება სხვადასხვა ასაკისა და გემოვნების ადამიანს. გამოცდილებამ გვაჩვენა, რომ ჩვენს ნამუშევრებს იხდენს ის, ვინც ადრე ნაკლებად იყენებდა მკვეთრსა და მასიურ სამკაულს.
რაც შეეხება ჩვენს ნაწარმს, საზოგადოებას ვთავაზობთ სამკაულის მრავალფეროვან არჩევანს, მათ შორის: საყურეებს, ყელსაბამებს, სამაჯურებს, ბეჭდებს. სამომავლოდ ვგეგმავთ აქსესუარების მიმართულების დამატებასაც და მომხმარებელს შევთავაზებთ ჩანთებს, ქამრებს და სხვა ნივთებს.
ძირითადად, რა სახის მასალას იყენებთ თქვენს ნაკეთობებში?
მასალებს რაც შეეხება, ვიყენებთ ბუნებრივ ქვებს, ვერცხლს, სხვადასხვა სახეობის მეტალს, თითბერს, სპილენძს, ტყავს. ჩვენი მთავარი იდეაა მუდმივი ძიება და იმპროვიზაცია, რადგან არსებობს მასალების მრავალი, ხშირად უჩვეულო არჩევანი, რაც საშუალებას გვაძლევს მუდმივად დავხვეწოთ და განსხვავებული სახე მივცეთ ჩვენს სამკაულს.
რა მიგაჩნიათ ბრენდის ნიშად?
როგორც ჩვენი მომხმარებლები ხშირად აღნიშნავენ, ორიგინალური, მასიური ბეჭდებითა და ყელსაბამებით გამოგვარჩევენ ბაზარზე.
ჩვენს ნამუშევრებს ერთი ხელწერა აქვს და ყველა მარტივად ცნობს, რაც ძალიან გვახარებს და გვძენს მოტივაციას, საკუთარ მომხმარებლებს შევთავაზოთ კიდევ უფრო მრავალფეროვანი არჩევანი.
აქვე მინდა აღვნიშნო, რომ Naniko Rodonaia Jewellery-ის ნივთები არ მეორდება. ვცდილობთ, ჩვენს ყველა მომხმარებელს ჰქონდეს ერთადერთი და ორიგინალური სამკაული ჩვენგან.
როგორ ხდება შეკვეთა და რა დრო სჭირდება ნამუშევრის მომხმარებლამდე მიწოდებას?
შეკვეთებს ონლაინ ვიღებთ, თუმცა ხშირად ეწყობა გამოფენა-გაყიდვები სხვადასხვა ლოკაციაზე, სადაც საზოგადოებას საშუალება აქვს მოვიდეს და ადგილზე შეარჩიოს მისთვის სასურველი სამკაული.
გარდა ამისა, გვაქვს მიწოდების სერვისი, ხოლო შეკვეთის მიღებიდან ნივთის დამზადებასა და მიწოდებას დაახლოებით 8-10 დღე ესაჭიროება.
FB: Naniko Rodonaia Jewellery
Insta: nanikorodonaia
Tel: 555 27 25 27
ტექსტი: ციაკო ღამბაშიძე
