გაეროს მოსახლეობის ფონდის (UNFPA) საქართველოს ოფისის და არასამთავრობო ორგანიზაციის „ვიზრუნოთ ერთად“ სოციალური კამპანიის „კაცები ზრუნავენ“ მიზანია, წაახალისოს კაცების, როგორც მზრუნველი მამებისა და მეუღლეების ჩართულობა ოჯახური კეთილდღეობისა და შვილებზე ზრუნვის საკითხებში, რათა მამაკაცებმა უფრო აქტიურად დაუჭირონ მხარი ქალთა თანასწორობას და თანაბრად გაინაწილონ საოჯახო საქმე.
OK! „კაცები ზრუნავენ“ წარმოგიდგენთ კამპანიაში ჩართულ კაცებს – მამებს, რომელთათვისაც გენდერული თანასწორობა, მზრუნველობა, ჯანსაღი გარემოს შექმნა და პასუხისმგებლობის განაწილება მნიშვნელოვან ღირებულებას წარმოადგენს.
კამპანია „კაცები ზრუნავენ“ ხორციელდება შვედეთის მთავრობისა და ევროკავშირის ფინანსური მხარდაჭერით.
ტექსტის შინაარსი წარმოადგენს ავტორების პასუხისმგებლობას და შესაძლოა, არ ასახავდეს გაეროს მოსახლეობის ფონდის, შვედეთის მთავრობის და ევროკავშირის ხედვას.
ალექსანდრე ლორთქიფანიძე – ტელეწამყვანი, ბლოგერი
მამობა განსაკუთრებული პრივილეგიაა. პრივილეგია, რომელსაც მოაქვს პასუხისმგებლობები, შიშები, თავის ტკივილი, საზრუნავი და ა.შ. მაგრამ ორჯერ მეტი სიხარული, ენერგია, ძალა, სიცოცხლის უნარი, სიყვარული და ყველაფერი ის, რასაც საკუთარი შვილის თვალებში კითხულობ. სწორედ ამიტომ, მივიჩნევ, რომ თითოეული მამაკაცის, თითოეული მამის უდიდესი შესაძლებლობაა მაქსიმალურად ჩართული იყოს შვილის ცხოვრებაში, მასთან ერთად გაიზიაროს ყველა ის წუთი, რომელსაც ბავშვი გადის ცხოვრების პირველ წლებში, იგრძნოს ზემოთ ნახსენები შიშებიც და ბედნიერებაც. ამ შესაძლებლობის გამოუყენებლობა, რომელიც შეიძლება გამოწვეული იყოს სხვადასხვა სტერეოტიპისა თუ სტიგმის მორჩილებით, დანაშაულია − როგორც შვილის, ასევე საკუთარი თავის წინაშე. კამპანია „კაცები ზრუნავენ“ ცდილობს დადებითი ეფექტი მოახდინოს ოჯახში მამაკაცების მზრუნველი როლის ამაღლებაზე, მათ ჩართულობაზე შვილების ცხოვრებაში, თანასწორი ოჯახის იდეაზე და ვფიქრობ, ნელ-ნელა უკვე აღწევს ამას. ჩემთვის პატივი და სიხარულია, ვიყო ამ კამპანიის აქტიური მონაწილე, მაგრამ კიდევ უფრო დიდი სიხარულია, როდესაც უქმეებზე, პარკებში გამოფენილ, შვილებთან მოსეირნე მამებს ვხედავ. როცა ვხედავ მამებს, რომლებიც ოჯახში არა სტუმრები ან უბრალოდ დამხმარენი, არამედ მეუღლეებთან თანაბარროლიანი წევრები არიან, იღებენ საკუთარ თავზე ყველა იმ გამოწვევას, რომელთა მიღება მათი ოჯახის წევრებს უწევთ, იცნობენ შვილებს ყველაზე უკეთ და არიან მათთვის მეგობრები, საყრდენი და იმედი. მამობა განსაკუთრებული პრივილეგიაა, რომელიც უნდა დავაფასოთ და ვიყოთ საუკეთესო მამები ჩვენი შვილებისთვის.
